Welcome to Natural Television

                                                 *Photo by Antòniu

Adictu a TV Natural

   

   Saboreu las delicias de la Mairi Tierra mentris me jincu n’el almuerzu un pratu de prísigus frescus con bananas y contemplu la “TV natural” endi la mi ventana… sintiéndumi sin dúa privilegiáu.

Namas puéu sintonizal en esti receptol un únicu canal peru esu sí, en vivu y direutu: Canal Montaña.

Reconozu qu’es lu mesmu de continu: el bosqui de robris y castañus cuasis metiéndusi po-la pantalla ‘el televisol (la ventana), las praéras a lu largu, el caminu y en lu altu, las cumbris -a veḍis picúas- a las cualas musotrus las habemus poníu nombris pola curiosidá de las sus formas y peculiaridadis (picu Rinoceronti sin cuernu, picu Mamut, montaña de Cuarzu, etc.). Peru a iḍil verdá nu siempri es lu mesmu, ca momentu es distintu, pus hai vida: un pajarinu jaḍiendu el su ñíu, vacas trasumantis que subin pa la sierra, una maná de cabras montesas qu’ajuyin de los rigoris ‘el hivielnu y abajan, luḍi un sol espléndidu, una espectaculal tormenta eja el ecu de los sus troníus po-los vallis, la otoñá da pincelás multicoloris, nieva con juerza, la nébula debuja fiordus… y los mil ruíus… u el silenciu.

Nu hai espacius publicitarius ni programas “nu aptus”… y en efeutu, siempri de baldi.

Anochi, me s’ocurrió punel un ratinu la TV artificial (caja tonta) mentris cenaba y…

las imágenes que púi dinguelal en apeninas unus minutus juerun desolaóras:

Genti en Moscú, con mascarinas n’el jocicu ajuyendu de la densa bruma ‘el jumu los incendius qu’arrasan Rusia con la seca, decenas de muertus en los mesmus; milentas presonas ajogás y millonis sin jogal enas lluvias torrencialis de Paquistán e India, Madame Obama y toa la parafernalia ‘el su sèquitu, vesitandu la praza ‘ torus de Ronda con gastus millonarius en seguridá; mujeris en Irán, sistematicamenti jumillás… Uf!

Ejáimi enchufalmi a la teli natural!... Nu emporta ondi, nu emporta cuandu.

Agraecíu.

Bóvidu y Montaña

                                                    *Photo by Antòniu

Torus?... No, agraecíu.

   Una veci, jaḍi añus abondu, púi dinguelal endi cerquina los ojus d’un toru agonizanti en una praza d’un pueblu… con el escandalosu charcu de sangri de costumbri, arreol. La mirá ‘el animal nu mentía: ¡Espresaba una tristura esgarraóra! (los torus sientin mesmamenti). Endi altoncis lu vidi craru:

Sí, me merecin respetu aquellas presonas que pol mé la tradición, la cultura, etc. aman la tauromaquia peru muchu más respetu y consideración me mereci el toru qu’ al fin y al cabu es criáu pa finalmenti sel torturáu cruelmenti y asesináu... pa esparigilsi el presonal. Velailu.

Se puéi doral la píldora de continu jerri que jerri con alusionis y metáforas que puéin dil endi el minotauru de Creta jasta Picasso, pasandu pol razonis históricas, económicas u d’identidá peru se miri comu se miri cualisquiel “festeju” taurinu (cualisquiá, sin esclusiónis), es una salvajá injustificabli e injusta.

¿Libertá pa los que desean corrías de torus? Si juesi con feguras de cartón… ¡pol supuestu! ¿Qu’hai de la libertá y la dinidá de los astáus?

¿Sensiblería?... Metánsi n’el su pelleju.

¿Que l’adrenalina de la “lidia” lus rejuyi el dolol?... improbabli. En to casu… ¿justifical d’igual móu la padecencia minguá po-la hipersecreción adrenalínica frutu ‘el miéu a la briega, d’un dagal (recrutáu si cabi po-la juerza) con metralla n’el pechu? ¿justifical de pasu el ejerciciu sin sintíu, legalmenti institucionalizáu, de los conflictus bélicus?... Las comparanzas nu siempri son odiosas.

Es prejisu dil p’lantri: No a la briega de gladiaoris, no al escravismu, igualdá de sexu, no al racismu, justicia social... abolición ‘el maltratu animal… y ya poníus, abolición de la guerra y defensa planetaria. Pol cima d’estéticas y “concepcionis artísticas”.

A sabel, toínus los seris vivus semus igualis, semus ijus de la Mairi Tierra... bóvidus y homo sapiens incluyíus… pol muchu que mus queramus miral el umbrigu.

Y, en efeutu es comprensibli qu’un indiu Yanomami o un Inuit caci… lu mesmu que jaḍi el león, el lobu u la lúndriga. Esu es supervivencia.

Algotru día, se puéi palral de las virtudis ‘el vegetarianismu.

Amón Ra

                                     *Photo by Antòniu

                                    "Amón Ra n'El Cairu"

Amón-Ra

   Son cuasi las tres (pm), salu ‘el trebaju con cierta cansera... Recibu el guantaḍu de la flama de la meyudía. ¿Hadrá 40º C?, iḑin que vienin airis ‘el Sájara.

Introduzu la mi manu enas faldriqueras y sacu las llavis de la mi máquina de consumil combustibli fósil. Reconozu el familial tintineu n’el roci entri ellas al abril la puerta. ¡El cochi paeci una sauna a másima potencia, el día de más calol ‘el sigru, en Atacama!... Sin embargu, m’ acuerdu d’ eneru, puniendu con deus dolorosamenti gélidus las caenas  enas rueas en metá una nevá desagerá. Es güenu sintil el pasu las estacionis, es güenu sintil.

El rugíu ‘el motol deseguía me pon en ruta.

Conduzu aspacinu disfrutandu de la belleḍa ‘el paisaji. En efeutu, el estíu va dandu pincelás verdi amarillosu peru enos picus más altus de la montaña entovía percebu angún neveru que s’arresisti a rejuyil al hivielnu.

De repenti agazapu una curva cerrá abondu y al salil d’ ella, la fegura deslumbranti d’ un sol abrasaol de quiciás 40ºC m’ enciega completamenti. Pol momentus me sientu molestu y jasta m’entran ganas de despotrical contra el astru rei.

Pol fin pillu una larga recta. Llevu las ventaninas completamenti abiertas y una impetuosa corrienti d’airi calienti m’ invadi.

En un intri concretu, tou paeci perfeutu: el vientu sajarianu lambiendu la mi faci, “No, woman, no cry” de Bob Marley ena radio… y en frenti, de continu la reondé luminosa de la nuestra estrella.

Influenciáu quiciás po-l’alta temperatura y el relax de la condución, entru en un curiosu estáu de "concencia". Me sientu estrañu y sientu toínu agradablimenti estrañu.

Escomienzu a dinguelal el mi arreol d’ una manera especial… si cabi con l’asepsia ‘el oservaol endi juera u el que lu jaḍi pol primel veci. Llegu a maginalrmi com’ un estraterrestri trayíu d’ un áridu asteroidi pa sel jincáu en un veículu evolucionáu( la mi máquina de consumil combustibli fósil) que recorri un paradisíacu planeta llamáu Tierra.

Aguzandu posiblimenti la sensibilidá, apreciu tou con una sutileḍa indescriptibli. Descubru desbordanti juerza esistencial en cuantu m’ arrodea… y el sol ya es Sol… el mu helénico dioh Helios, el supremu Amon-Ra egipciu, el to poerosu Inti incaicu.

En Flashback retrocedu unus añinus atrás: l’amanecía n’el templu de Karnak enas riveras ‘el ríu Nilu, la ígnea silueta ‘el discu solal completamenti naranja iluminandu las mis juéyigas ena avenía de las esfingis

Namas me s’ocurri susurral algu agora:

¡Agraecíu Pairi Sol!

Cúpula celesti

   Ya vienin siendu más de las 24 horas.

Alán y Alba duermin. Salu de la mi enrramá pa sintil una mijirrinina la nochi. Istintivamenti agilu renti el canchu de miral pa las estrellas y me tumbu un ratinu en metá d’el. Montañas a los cuatru puntus cardinalis que jaḍin d’almuá y la cúpula celesti preñá de galasias, pol sábana.

Pol momentus, percebu a esti improvisáu jergu, comu una continación más del úteru de la Tierra… y me veu a mí mesmu com’ un ḍagalinu, chiquerreninu, polcima ‘ la reondé ‘el planeta… microscópicamenti giganti.

En un intri, escomienzu a ascuchal el latíu de Gaia con juerza:

PUM- Pum, PUM- Pum, PUM-pum

Mas dómi de cuenta de qu' el pulsu provieni verdaeramenti ‘el mi pechu y… me riyu. U, acasu… ¿es el ecu ‘el su corazón n’el mi cuerpu?

Permanezu en silenciu pol drentru. Una levi mareína cálienti de veranu acaricia la mi cara, susurrando en los oyíus cancionis de grillus y de corrientís d’augua endi largu.

De golpi, el atronaol rugíu de los motoris d’un avión que navega parpagueanti pol to’l cielu, me sabi a homo sapiens y cuasi me jaḍi ajuyil del paradisu… peru una estrella fugaci… y dispuésinu otra, enmuécin los mis pensamientus elantri la inmensidá ‘el Universu.

…Y me veu a mí mesmu  gigantescamenti microscópicu.

Pintura telúrica

   Denominu asina a la mi pintura pol estal quiciás relacioná abondu con los elementus de la Mairi Tierra, veleí en jorma y fondu.

Recopilu y recopilan pa mí, en lugaris especialis: tierras, arenas, pigmentus naturalis etc… de diversus coloris, testuras, mesmamenti aromas.

Ca cuadru porta la impronta de distintus territorius (incluyíus espacius emblemáticus), de distintus grupus humanus,... amás la energía propia ‘el planeta.

En ocasionis, jincu detallis chiqueninus de materia orgánica perdurabli, ésidus, mica, cuarzu cristalizáu, gemas, cristalinus volcánicus erosionáus po-la mar etc.

Suelu labutal sobri tábula fina. A veḍis arrejundin viejas tábulas de casas efarrungás, cachinus de maëra de barcu pulíus po-la mar etc.

Puéi idilsi que d’anguna manera empreu el “puntillismu”, el depósitu minuciosu y lentu de materia sobri el soporti. Nu hai grandis pincelás comu en acuarela u óliu.

Ajuyu de la “simplúra” de lu entrevejiláu, me seduci lu “entrevejiláu” de lu simpli. Me sientu, en grandi medía, arrempujáu po-las manifestacionis artísticas más primitivas… tamién nel usu de los elementus: arti rupestri, pueblus prerromanus, Egiptu, África Negra, Aborigin, pueblus precolombinus, románicu. Lu arcaicu, lu étnicu, lu mágicu, mundus legendarius u perdíus, seris fantásticus… Sin olvial lu cotidianu.

Esisti un ritual al jaḍel la obra: apalpal la tierra, sintila, golela, recordal, manipulala con sumu respetu. Es prejisu juegal con las tierras, con las cantidadis d’augua, con la temperatura de secáu, con las mesclas etc. pa consiguil efeutus deseáus: jiendas, cráteris, volúmenis, testuras, brillus, tonalidadis. Es obrigáu ejal reposal los elementus creáus, en fasis, y esprimental visualmenti el efeutu causáu pa dil acontinandu dispuesinu...

Na es de Baldi.

Po otru láu, consideru las propiedadis e influencias de los elementus qu’arrepañu a la hora d’aplicalus comu material pictóricu. Del mesmu móu, nu me son endiferentis ciertus conceitus de la cromoterapia.

Tamién esisti, quiciás, un valol mágicu más allá de lu meramenti perceptibli… acasu emulandu lu chamánicu y arquetípicu de la pintura parietal prehistórica.

Hai algu más que cuadru, va alma. ,

En las escenas precuro aportal un mensaji subliminal d’ harmonía.

Y polvus mágicus d’intuición y amor creativu…

*Painting by Antòniu

"humanus y sol"

Unicornis cælestis

*Painting by Antòniu

Hoi

   Hoi eh el primel y últimu día enantih d’a mañana. Prioritariu en un jaci grandi d’ocasionih prioritariah de sel sintíah… prioritariamenti …
A mañana, nu esihti. Navegamuh enel hoi.
Agilamuh, jereéruh de luh antiguuh primatih, con finu pelleju y caëza evolucioná. Portamuh un corazón que lati máh allá lu predehtináu po-la nuehtra información genética y lu socialmenti correutu… puh habemuh miejón propiu, alma.

dama danzanti

Tú precuras los pigmentus, el ocri, el ésidu de jierru, el humus, l'arcilla sangri ... y en dispués de milenius,
los jincas nuevamenti en las mis manus.
Y al latíu 'el tambol, retomas el pulsu y danzas con piesis esnúus.
Y'arrecuerdu.

*Painting by Antòniu

humanus, équidus y astrus

*Painting by Antòniu

Bosquimanus

   Sobrevivéis arrepañandu tubérculus n’el desiertu, cazáis con sabencia namas aquellu que vus jaḍi falta y bebéis l’augua ‘el rocíu.
Prendéis el juegu frotandu palus, las vuestras hamburguesas son gusaninus, las vuestras emisiones: 0% y compartéís cuantu alcontráis generosamenti.
Nu habéis Internet ni compra on line… El G20 y el su egoismu prepoteni, a vusotrus, vus quea a añus lû de distancia.
Solu prejisáis un cachinu lumbri pa calentalvus po-la nochi… y una mijirrinina d’ augua pa hidratalvus.
Vus desprazan de los vuestrus sagràus territorius dispués de destruyil los vuestrus jogaris y masacralvus. Vus jaḍin dil a’scuelas “ocidentalis” rejuyendu la vuestras tradicionis y vus imponin suaérus escravizantis.
…La mesma hestoria de siempris.
Cultu pueblu bosquimanu!

Vagal pol el mundu

Vagal pol el mundu

comu relucienti,

qu’endona luci al ecosistema,

a cambiu d’ un abrazu de Vía Láctea...

una nochi de veranu.

*Photo by Antòniu
"Caballinu volaol y jelechus"

Cursu d'iniciación a la pintura telúrica

                                             

                                                                            

                               ARTI DE LA MAIRI TIERRA

                 CURSU D’ INICIACIÓN A LA PINTURA TELÚRICA

Data:

Viernis 27, Sábau 28, Domingu 29 d’agostu de 2010
Sitiu:
Taller de la Montaña (Sierra de Gredus)
Guijo de Santa Bárbara
Cazris
Destinatarias/us:
Aquellas presonas que desein inicialsi ena creación pictórica con tierras, arenas, pigmentus naturalis, gemas, cristalis, materia orgánica perdurabli etc.
Objetivus:
Familiarizal con el “material pictóricu” que generosamenti mus ofreci la Mairi Tierra. Conectal con dicha entidá nel selectu entornu natural que mus brinda el Taller de la Montaña.
Potencial la propia creatividá. Descubril la variedá cromática, de testuras, mesmamenti d’aromas que mus regala la pintura telúrica. Informal al tentu las propiedadis y beneficius de los elementus... y de la propia pintura.
Ispiertal la sensibilidá. Sirvil, d’anguna manera, comu puntu d’apoyu nel caminu de l’harmonización interior.
Posibilital la socialización en un grupu d’inquietudes afinis.
Inclui:
Nocionis teóricas y prácticas. Arrepañaúra guiá d’angunas tierras y materia orgánica perdurabli. Material pictóricu específicu (diversas tierras y pigmentus, aglutinanti, tablas, pincelis, cribas, etc.).
Hospedaji en casa rural. Trasporti diariu al tallel si es nesezariu. Manduca completa. Refrigerius, infusionis. Escursioncinas guiás a lugaris emblemáticus. Material didácticu.
Enviti:
Sienti la juerza de los elementus, adeprendi a trebajal con ellus, emprecipia el tu propiu caminu creativu en conesión con la Mairi Tierra y el tu interiol.
Percibi la belleza ‘el bosqui enos escomienzus de la mañana o a l’atardecía, la pâ ‘el Semicírculu Sagráu, la limpia cúpula celesti nocturna a tupil de galasias…
Pinta tamién, si t’apeteci, el tu pelleju de tierras y lávati dispuesinu enas auguas cristalinas ‘el arroyu de los caballinus voläoris-jadas.
Descubri la magia de la pintura telúrica... la tu propia magia.
Crea y creci.
Contauto:
Tf: 650561234
telluric_art@yahoo.es,telluric.art@gmail.com

Taller de la Montaña

                                                 tm

   Taller de la Montaña, hubu nacencia jadi anguninus añus comu espaciu consagráu a la creación pictórica, en conesión direuta con un encravi natural especial abondu.

Está situáu drentru d’un área d’especial proteción en plena Sierra de Gredus, ena comarca de La Vera, a 1160 metrus d’ altitú.

S’alcuentra arrodeáu de matonis de robri y castañu, praëras, arroyinus… y los picus con nievi la juerza ‘el añu, comu escenariu ispiraol de continu.

Jue concebíu comu sala d’ esposición premanenti de pintura telúrica y como lugal pa’l desarrollu d’actividadis.

Tieni un frenti acristaláu de jocicus a la grandiosidá ‘el valli y la montaña, suelu de maëra y estufa de leña pa la otoñá y el hivielnu.

La finca tieni maníficus árbulis, praëra, dos alberquinas y rinconis pa’l arrecogimientu.

Taller de la Montaña (y los sus arreoris), tamién es un puntu abiertu al alcuentru con unu mesmu y al contautu harmónicu con la Mairi Tierra.

Teluria

                         (de tellus-telluris, La Tierra)

   Teluria es la nuestra mairi Tierra u si se prefieri, el nuestru pairi planeta Tierra.
Son toínus los elementos, los seris vivus e inertis de la Tierra… las sus entidadis físicas y l’alma de ca unu drentru d’un Universu acasu infinitu.
Los fenómenos, tamién.
Teluria semus musotrus, homo sapiens, dependientis y escachinaóris del ecosoistema.
Las nuestras culturas milenarias y cuantu emergi del nuestru interiol.
Teluria abarca to lo terrenu, to lu inherenti al planeta, to aquellu que cumpriendu unas leyis d’esestencia en un procesu evolutivu general, está velaquili.
Esisti un latíu común en Teluria. El latíu de la su energía, de las sus juerzas d’aentru y d’ajuera, el jilu conductol de la energía telúrica.
Teluria tieni espritu. Acasu emana del núcleu terráqueu central incandescenti que genera u mantieni el giru sobri el su propiu eji viajandu arreol ’el Sol a millonis de quilometrus pol día… y esi espritu fluyi pol to lu esestenti, distribuyéndusi y recargándusi al mesmu tiempu con to.
El sol, a la su veci, viaja arreol d’estructuras superioris a velocidadis y distancias insospechás. Si cabi, el Sol es el corazón que bombea sangri universal al planeta.
Acasu esisti un enormi canal d’impulsu vital endi él jasta la Tierra y los sus seris… más allá de lú y calol.
Acasu, del mesmu móu, el Sol es receptol d’otru provenienti de la Vía Láctea, la su galaxia, y asina “Ad Infinitum”… Acasu esisti una redi insospechámenti giganti distribuióra de, igamus, energía universal divina (eud).
Acasu el miejón del Universu estaba en un núcleu relativamenti chiqueninu de masa cuasi infinita cargáu de rebosanti eud enantis del Grandi-Estrumpiciu. Acasu Dioh (u Diosa).
Teluria sinifica sabencia. Belleḍa. Lealtá con la evolución. Oferta d’un paradisu, de calol vital, d’alientu.
Los muestrus piesis pisan Teluria, las nuestras manus apalpan Teluria, los nuestrus ojus percibin en toa la su plenitú Teluria, los muestrus jocicus saborean Teluria… los nuestrus oyíus, los nuestrus olfatus, los nuestrus pellejus, la nuestra esencia, sientin y jorman parti de Teluria…
Las nuestras sensacionis tamién.
Toínu lu demás es intranscendenti.

*Painting by Antòniu
"Dioh Mamut portandu planeta Tierra"

Endirgui Taller de la Montaña

Ver mapa más grande

Garabateandu en arameu

Ya es más de meyanochi.
Ascuchu antiguas melodías tibetanas qu’enduzan el palaal enos oyíus, en un vieju equipu made in japan. Ajuera la montaña escansa dandu cobiju a los sus seris en milentus juchis de sëa verdi. La lluvia jadi música al acaricial el tejáu ‘ la mi enramá… la mi enramá d’aentru tamién palra, catapultandu mirás perdías a las llamaretás crujióras de la chuminea. Juñu paeci recordal la otoñá comu preludiu quiciás prepotenti d’un solsticiu eslumbraol.
Tecleu con deus cansámenti ispiertus sobri el panel ‘el mi ordenaol, con la mesma torpeza qu’un analfabetu adeprendi a garabateal en arameu. Al tentu, analizu visualmenti los mis deus y compruebu que son los mesmus d’acaricial mariposinas ena iscuela de cagonis… peru más gordus.
A la luci d’un flesu azul, intentu destirajal latíus en ca frasi.
Una y otra veci, píu premisu al labyrintu de palabrus pa puel recebil un abradu certeru de las musas peru velailas agilandu bebías nel enfinitu desfili de posibilidadis verbalis y tactilis (pol aquellu ‘el tecláu)… y un tantu masoca, navegu madrugá al aguardu acasu ‘el justu vocablu u l’alquimia ‘el parrafu perfeutu… robándumi horas de sueñu.
El ruíu ‘ l’agua ‘el canalón arremata en esti intri.
Un grillu solitariu, ejerci el sacru drechu de recital los sus mejoris versus, comu insuperabli desafíu de belleda literaria y humildá… acallandu el mi egu.
                                                   Griii, griiii, griiiii
Asina y to, arrebuscu anelanti esi mínimu testu que justifiqui esti tiempu y esti espaciu, enantis de dilmi p’al mi jergu. Sin embargu namas atinu a embestil con párpagus pesúus divagandu lentu y precariu sobri el menúu tecláu… lo mesmu que borrachu con farola en bradu con voci ronca garabateandu tonás en seuduarameu:
                                                      Toc, toc, toc
N’ostanti intuyu un craru en metá’l cielu y abru las cortinas.
Solemnimenti veu surgil el cuerpu esnúu de la cúpula celesti preñàu de galasias. De repenti una estrella fugaci ajuyí ‘el úteru ‘el firmamentu, surcandu sutilmenti el su vientri. La mi musa prefería, m’ofreci un apasionáu besu y creu alcontral enos sus bezus el mensaji prejisu.
Eju de descrebil. Simplimenti jablu bajinu nel mi pechu:
                                                      Mère Terre,
                                                        je t’aime.

…Mairi Tierra, t’amu.
Y aprovechu pa piil un deseu.
   (12-juniu-2010)

*Photo by antòniu
"Lúa na montaña"