Etiquetas

domingo, 12 de febrero de 2017

N'KOB... ⴰⵎⴰⵏ ⵉⵎⴰⵏ (N'Kob... l'eau c'est la vie)

    
Crónica
"Pour la millière fois, les résidents de N'Kob demandent encore une fois une solution radicale pour le problème du l'eau potable. STOP aux promesses creuses..." (Pol milenta veci, los residentis de N'kob piin de nuevu una solución radical pa'l problema 'el agua potabri. STOP a las promesas buecas)
Asína iḍía una pancarta d'unus manifestantis n'el pueblu de N'Kob, qu' andaban protestandu contra la desidia istitucional anti la problemática l'agua potabri qu'ha habíu nacencia eni jaḍi unus añinus.
Imus a situalmus, N'kob es una linda localidá de la provincia de Zagora, n'el suresti de Marruecus. Es mestel ejal costancia de los sus edificius d'adobis, el su palmeral y las sus decenas de Kasbahs (Viviendas fortificás de tradición berebel dedicás hoguañu al turismu).
Toínu diba bien en N'Kob, jasta que con estu 'el cambiu climáticu, emprecipiarun los trevejilis al tentu el acesu al agua potabri. Concretamenti, asigún m'informó Ahmed Et-tahery (coordinaol de la plataforma po-la defensa l'agua de N'Kob), a partil 'el añu 1984, el índici de pluviometría ha díu minguandu drásticamenti. Pol mé d' ellu, la población vieni padeciendu una situación límiti. El corti, caicuandu 'el suministru d' augua potablri, especialmenti en metá 'el veranu, está prevocandu gravis quebraerus de caëza ena vida normal de los habitantis, qu'asigún el informi d' Ahmed, en ocasionis han teníu que descogel entri la emigración clandestina u dil en cata agua de duósa calidá a una tupa quilómetrus.
Mentris, los políticus ajuyendu a topi d'la custión y mesmamenti, si cabi, desfiandu fondus... esu sí, en ca procesu electoral monecipal, prometiendu solucionis deseguía.
Asigún otru amigu informanti, las cuasi 50 kasbahs (actualis complejus turísticus), anti la demanda insaciabri de consumu d'agua pol parti el turista occidental, recurrin al costosu suministru d'agua con el trasporti en cisternas... los habitantis d'a pie, s'enjallan anti un delicáu enganduju. Paeci sel, que los cultivus estivalis han ejáu d'esestil endi jadrá tres añus y en'esti ivielnu de 2017, y'han escomenzáu los cortis d'agua.
La genti de N'Kob está tupía de promesas y ha emprencipiáu a movilizalsi, a pesal las amenazas de las autoridadis.
N'Kob es solu la punta 'el Iceberg de la crisis de l'agua potabri n'el planeta Tierra.
P'lantri amigus y amigas de N'Kob!     ⴰⵎⴰⵏ  ⵉⵎⴰⵏ,  l'eau c'est la vie, water is life... l'agua es vida!.










  

   









video

domingo, 1 de enero de 2017

Nochi Vieja


Nu esisti relol...
solu Sol y latíus.


photo by antòniu
última poniúra de Sol del añu




domingo, 25 de diciembre de 2016

OTOÑU


Los bezus de los mis ojus,
bebin la sangri
'el cálici maúru 'el otoñu... 





































video

domingo, 29 de mayo de 2016

Navegandu

Zarpu de nuevu de la costa de los vallis. Navegu po-la mar de la montaña, cuyas olas salpican en los mis ojus con espuma de pétalus d'oru. Y desembarcu en una ínsula de apacibris prayas, ondi eju agilal al ecu de la voci de los mis latíus.

photo by antòniu















video

La primavera agila

La primavera, es una dama callaína qu'agila lentu con piesis escalzus po- la montaña.  Asciendi jasta alcontralsi con'el hivielnu enos picus más altos, en tovía con nievi. Y al su pasu, va ejandu un mar amarillu de piolnus qu'avanza con'el su oleaji ascendenti... día a día... ola a ola.  Ambaju, enos vallis, los pétalus van dandu pasu a las semientes comu preludiu de la llegá 'el veranu. Y esti veranu, haberá d'agilal tamién sigilosamenti con los sus piesis esnúus, deseosu del mesmu mou, d' alcanzal el venerabri templu del hivielnu cuasi irreductibri de las cumbris.

photo by antòniu