Etiquetas

sábado, 26 de marzo de 2011

viernes, 25 de marzo de 2011

Sol de liquin

Desliciu la mi mirá pol el canchu, asperandu namas dureza pétrea, insensibli e inerti… y ena selva de las menuencias, descubru al mesmu Sol que regala savia a los mis latíus, en jorma de liquin silenciosu.
Y soriyu, mentris reconozu enas mis arreiḍis unus piesis con drechu a agilal… y el gritu ‘el mi miejón se dilui n’el ecu d’un mundu de millonis de millonis d’almas que tamién latin.
*Photo by Antòniu

lunes, 21 de marzo de 2011

Primavera

La primavera,
debi sel un gritu...

*Photo by Antòniu

miércoles, 16 de marzo de 2011

FUJI YAMA

Un sopru d'airi frescu pa'l Fuji Yama



*Photo by Antòniu
Esta mañana juími un ratinu en silenciu, renti los piesis de la gelmana Montaña.
Ráfagas de vientu fríu acariciaban cálidamenti la mi faci.
Con los mis deus jiḍi la silueta d’un corazón y encuadré drentru los picus más altus cubríus de nievi…Ejandu qu’el vientu se cuelara pol esi güecu y que jundeara el ecu ‘ los mis latíus jasta el monti Fuji Yama.
Y le susurré aspacinu en los sus oyíus, endi largu:
−¡Amigu, aceuta una mijina d’airi puru de p’aquí y que quéi limpiu el tu cielu!
¿A anguien más se l’apeteci endirgal un sopru de frescancia pa’l Fuji Yama?...
Que l’endirgui palabrus ‘el corazón con’el gelmanu vientu.


*Internet photo

sábado, 12 de marzo de 2011

Dura Mairi Tierra

¡Qué chiqueninu el sel humanu elantri la juria desatá pol el planeta ena más mínima sacuía ‘el su pelleju! ¡Cuánta desolación en escasus segundus!
Es inevitabli percebil agora a l’amá Tierra comu una despreocupá mairi qu’abandona a los su s’ijus n’el joyancu.
Es inevitabli la comparancia con un ḍagalinu malu qu’arrejaḍi la llamaretá d’ un fósforu a la entrá d’un jolmigueru, namas pol el prazel de vel retorcelsi a las probis jolmiguinas en la su combustión. Es inevitabli sintilsi frágil, pendiendu d’un jilinu de tela de morgañu que cualisquiá sopru d’airi caprichosu puéi segal… en cualisquiá intri. Es inevitabli nu rejuyil la mirá de las sombras de las gelmanas y gelmanus que sufrin embaju el mesmu Sol.
Ya sé Mairi Tierra, que tú acontinas con el tu caminu. Ya sé que tú nu jas distincionis:
Asína una jolmiga… Asína musotras y musotrus mesmus.
La nación ‘el Sol nacienti regila y llora.
*Internet photo
*Photo by Antòniu

viernes, 11 de marzo de 2011

Unicornius Caelestis

*Painting by Antòniu

En Monfragüi y el Lagu de las grullas


Jaḍi unus días, mus juimus p’al Parqui de Monfragüi aprovechandu una jeria d’ornitología. Deseguía mus punimus en un senderu y mus perdimus po-las projundidadis ‘el enclavi camufláus po-la  esuberanti vegetación.
El Sol lucía con juerza quiciás comu preludiu d’una primavera que quieri asomal el su jocicu bichaol, desanditu d’estrumpil en coloris y vida… y la verdá, s’ agraecía en dispués de mesis de fríu y nievis.
Anguien gritó
-¡Mirái p’al cielu!
Milis de grullas lo sulcaban jaḍiendu uvis, de nuevu caminu ‘el norti d’ Europa.
Altoncis propuní…
-¿Pol qué no mus imus p’al lagu de las grullas a espiílmus de las nuestras amigas jasta el añu prósimu, enantis de que se vaigan toínas?
Y asina jue. Cuandu llegamus, el silenciu de las auguas y l’ausencia ‘el escandalosu diálogu de las grullas, mus alertó de la su día definitiva… y cierta malinconía invadió al espaciu, ya sin ellas.
A pesal de todu, la vida jervía en Tierra, Augua y Airi.
Y el Pairi Sol mus acarició una atardecía más, enantis de juegal al escondichi.

Ya vus vais amigas gruyas, jadiendu uvis, p'al norti
Renti el grandi almeci
Agilandu pol una cueva d'árbulis
Ummm... Qué bien güeli!
Arrejadiendu los ojus renti una cueva 'el ríu
Ejandu qu'el planeta acaricii los nuestrus piesis...
La magia de la gelmana augua...
N'el su ñíu... tamién espíi al sol




La tu luh mus inunda... Pairi sol
Dear father Sun... we love you
Al dilmus pa casa... el cielu pari sangri 

sábado, 5 de marzo de 2011

Ascuchal...

Ascuchal el latíu 'el Universu en toínu cuantu lati,
ascuchal el propiu tamién... y sel conscienti







*Internet photo

jueves, 3 de marzo de 2011

Pairi y jixu "Homo Arborescens"


*Painting by Antòniu
Novenu mileniu, Era post-nucreal, la faci terráquea arrecupera las sus selvas. El sel humanu busca el su hábitat enos árbulis… acasu evolucionandu (involucionandu) jacia especiis d'homínidus primigenius.

miércoles, 2 de marzo de 2011

Sombras...


Ena mañana,
el grandi Sol jaḍi sombras
de lus estambris

*Photu by Antòniu

Alquimia esistencial...


   La busca de la plenitú esistencial, pasa, enantis de na, po-la integración con el mediu que mus dio la vida y que mus haberá d’acogel n’el su senu. Pasa po-l’asimilación de l’alma de la Mairi Tierra, pol el mimetismu n’el miejón, con la Naturaleza (n’el su  más ampliu sintíu).
Nu emporta ni el lugal ni el momentu, lu qu’emporta es sintilsl parti integranti ‘el Planeta… sintilsi un eslabón más ‘el ecosistema y gozal d’esi status. Compartil, disfrutal de la espresión de toínu lu vivu amás de los fenómenus naturalis: de ca sel humanu, de c'animal, de ca pranta, de ca gota ‘ lluvia, de ca copu ‘ nievi… de ca cuerpu inerti tamién.
Y sabelsi pereceéru, pereceéra, po-lo menus n’el planu físicu… entendelu y aceutalu con dinidá. Compartil el devenil de to los gelmanus y gelmanas animalis y prantas. Almiral ca rayu ‘sol que mus alumbra y desapaeci jasta que vieni algotru, de ca fasi de luna que da pasu a algotra... adeprendiendu.
Pol otra parti, el verdaeru viaji de la esestencia es el viaji de drentru … siempri, comu no, en concordancia íntima con'el Hábitat.
Es prejisu sintil, sintil po’ncima de todu, sintil el latíu de todu en to momentu, sintil los propius latíus. Es prejisu acogel la energía ‘el planeta en toínu cuantu aconteci. Es prejisu prantalsi elantri ‘el horizonti ca mañana y dali gracias al Pairi Sol pol habel nacencia. Velu escuendelsi a l’atardecía… y iḍili: ¡Hei, velaquili estoi yo!
Es prejisu vel surgil la cúpula celesti preñá d’estrellas, po-la nochi. Alimentalsi de la grandiosidá ‘el Universu, al cualu pertenecemus en cuerpu y alma.
Y amal, sin más.
*Photo by Antòniu