Etiquetas

sábado, 19 de marzo de 2016

INDIA... ANGUNAS IMPRESIONIS


Varanasi.
La ciudá sagrá 'el ríu Gangis... sagrá Diosa Mairi Ríu Ganga. Ciudá de cultu, ciudá  ondi la genti tieni que dil a arrugal el jocicu y a cremalsi.
El jormigueru de las callis que van de jocicus pa las escalinatas sobri el ríu. Velallí, un Aarti, a l'anochecía, una curiosa ceremonia religiosa con una tupa genti y música. Un santón esnúu, con'el cuerpu cubríu de cenizas al láu d'una lumbri, jumandu cannabis. Los perrus durmiendu enas cenizas p'ajuyil 'el fríu.
La juerti probeza es palpabri en angunus sitius. Casumbas de prásticus. Los muchachinus ( y las muchachinas), lindus abondu, a vecis con los piesis escalzus, con la sonrisa en los labius, amabrimenti... sumisamenti, a la cámara de fotus. Se ponin contentus, simplimenti de qu'angunu lus jaga una fotu... tamién las presonas mayoris.
Probis, peru gentilis. Elegantis esistencialmenti. A pesal de la su "miseria", con clasi esistencial.  Luchaoris natus po-la supervivencia.
Y mujotrus, los guiris, creyéndumus qué sé yo, disconformis con toínu, quejándumus de toínu (angunus más qu'otrus)... irreverentimenti... vergonzosamenti, si cabi, cortinus de miraeras, inorantis supinus, sin capacidá pa diquelal más allá de la fusca y la suciedá sin dúa prevocá po-la projunda miseria y la desidia istitucional jacia los más esfavorecíus.
Y mujotrus, a crelmus pulcrus y relambíus!
Occidenti, tradicionalmenti, a colonizal po- la juerza y la opresión, a saqueal las riquecias, la materia prima y polcima a crelmus mejoris.
Y velaquili,  la joía (desculpas) desigualdá, la inmoral y endina desigualdá... de castas y costis. 
















































































domingo, 13 de marzo de 2016



Rishikesh, en metá las montañas, renti al sagráu Gangis. Una tupa templus con las sus divinidadis y una tupa comercinus. 
Po-la mañana, mus imus aína abondu pa un monesteriu ena montaña, dendi ondi se puéi vel el Himalaya. Contemplu la nacencia 'el Sol, aluegu jaḍemus a pie una encantaora ruta de 17 km de descensu: aldeínas entri montañas, arrozalis, ḍagalas con ajocis, pastoris, lorus, una chorrera d'auguas cristalinas, monus...
Velallíli solu silenciu, nu ruíus, nu fusca. Se percibi más armonía y riquecia real qu'enas ciudadis. Ena naturaleza toínu paeci tenel sentíu.
En llegandu de nuevu a la ciudá, descubru una galería de cuadrus realizáus con pigmentus naturalis pol mujeris d'una aldea. Ajaj, el amabri ḍagal que la dirigi, m'enseña a obtenel angunus pigmentus d' hojas y cortezas d'árbul.
Po-la tardi, una güeltina en barca pol el Gangis. Enas sus riveras, los muchachinus se buscan las jabichuelas vendiendu velas con froris pa ejalas n'el ríu, en honol d'anguna presona. Lalta, unu d'ellus, es ispiertu, alegri y listu abondu (piensu cuantu valoraríe tenel la oportunidá de puel habel accesu a los estudius). Me vendi anguna d'esas velinas con froris que eju enas auguas 'el ríu, dispuesinu palramus un ratu y jaḍemus ranas n'el augua con pieiras.
Posteriolmenti contemplu una linda puniúra de Sol, ampié'l ríu. El Sol, paeci muchu más grandi de lu habitual... mesmamenti consigu fotugrafial anguna mancha solal con'el zoom de la mi cámara.
Al desotru, otra escursión a la montaña entri bosquis ondi vivin tigris y elefantis asigún iḍin.