Etiquetas

sábado, 29 de enero de 2011

juélligas




 Las mis juélligas
     jablan de los mis latíus…
ena nievi branca





pasus



los mis pasus
palrandu ena nievi,
caminu de casa…

brancu y naranja



El sol nacienti
jinca un besu naranja
n’el monti con nievi

*Photo by Antòniu




jueves, 27 de enero de 2011

HAIKUS




Ena madrugá
la luna jaḍi sombras…
àrbul, perru, yo












Árbulis esnúus
lambiendu nébula...
bebu siluetas


*Photu by Antòniu





La mi hija subi
a la encina grandi.
¡Qué bella!








El mi amigu sol
 amamanta ca día a…
los mis latíus


*Photo by Antòniu





Las  niñas dan pan,
a los caballus brancus…
un avión rugi.










Sol ena mi cara,
el rocíu ena yelba…
agilu lentu.








viernes, 21 de enero de 2011

Mar

*Photo by Antòniu


Mar y Caipirinha

¿Acasu emporta la nomenclatura de Dioh? ¿Pol qué no, Energía Universal Divina… y millonis de seris con entidá propia?
Y sí, libertá de creu… tamién Derechus Humanus y Nu Violencia.
Las especiis, las etnias: son espresión viva 'el latíu universal en ca rincón 'el planeta… más allá de jormas, rasjus u facetas.
¿Géneru, hábitat, tribu, ciudá, nación, planeta... acasu galasia? ¿Qué más da óndi u cuándu? Lu emportanti es la calidá del cómu. Toínus semus igualis, gelmanus ena supervivencia y l'adaptación.
Velequíli, a idil verdá, el Sol, es una juenti que regala pol igual l'augua cristalina de la esistencia a los sus hijus (¡que tienin sedi de latíus!)... es un pairi qu'ama pol igual a cuantu nutri.
Es prejisu sintil al Sol, pol cima todu. Sintilu y sintilsi.
Musotrus, los humanus, mus creemus superioris, con drechu a dominal, a esplotal, a esterminal… si es prejisu a otrus seris humanus. Mesmamenti, habemus legalmenti istitucionalizá la guerra ondi vergonzosamenti s' envía a la frol y nata, en plena joventú, a'spichal el poleu pol bobás y paranoias de cuatru ilumináus... y la brutalidá de los efeutus colateralis.
Sobri to, semus tamién animalis… y un poquinu prantas, si cabi.
Semus un eslabón más del ecosistema, de la evolución, de la biodiversidá
Toínu sel vivu meredi projundu respetu y consideración, más allá de lu diferencial u de la mayol u menol capacidá alquiría de defendelsi: ca homo sapiens, c'animal, ca pranta… tamién lu inerti.
Pol otra parti, La Tierra lati con juerza. Es la mairi que mus amamanta.
¿Pol qué l'ajostigamus tantu? (…)
−Eh!, amigo!. Deseja você comer alguma coisa?... caldo carioca, bacalhau grelado, frango com batatas ? morango e nata? Pra beber… Gosta você duma caipirinha?.
Ispiertu de la ensoñación prevocá po-la inmensidá 'el océanu embraveciu, que m'envuelvi a través los cristalis mojáus po-la lluvia. Emerju de las projundidadis de la melodía afru-zen-brasileira que suena, sentáu en un tabureti renti una estufa de carbón… ¡Ah!, y'arrecuerdu, estoi n'el bal “Belo Horizonte” de Figueira da Foz… Por fin miru pa la pizarra de menús y respondu al camareru:
−Sim… amigo… duas batatas ao forno, pão de milho, manteiga de cacau, morango com nata e xerope de maracuiá e... pra beber, uma caipirinha com muito gelo, ron torrado e limões selvagens das Caraibas. Obrigado.


domingo, 9 de enero de 2011

Ejal

Ejal fluyil la esestencia, asina pruma mecía pol el vientu. Atesoral el propiu miejón. Que los latíus sean la guía de la frenti qu’agila. Dal sin pretendel, recebil agraeciendu. Arretenel tan solu la indispensabli presencia ‘el Universu. Comprendel definitivamenti que la soledá nu esisti… sinu inseguridá, reconcomeéru y egu. Rejuyil el miéu, rejuyil la culpa. Nu renuncial al drechu a erral ni al don de nu sel perfeutu. Sel emocionalmenti autosuficenti, suficientimenti emocional.
Piesis p’apalpal, manus p’andal, oyíus pa jablal, jocicu p'ascuchal, ojus pa latil… corazón pa vel. Crecel, creel, creal. Amal…veleili. Habel sueñus.
Ejal fluyil las alas.

*Photo by Antòniu

sábado, 1 de enero de 2011

XII uvas

Una uva pol el desarmi n’el mundu.
Dos uvas po-la fraternidá.
Tres uvas po-los derechus humanus.
Cuatru uvas po-la libertá.
Cincu uvas po-la igualdá y la justicia social.
Seis uvas pol el no ajostigamientu a la Mairi Tierra.
Sieti uvas po-la biodiversidá.
Ochu uvas po-la liberación de los animalis.
Nuevi uvas po-la pluralidá étnicu-cultural y lingüística.
Die's' uvas po-la harmonización de ca individuu.
Onḍi uvas po-la creatividá.
Doḍi uvas po-la vidi.

*Photo by Antòniu

2010

Añu 2010... agraecíu pol c’amanecía, pol ca puniúra ' sol. Agraecíu pol ca día vivíu y sintíu. Agraecíu pol ca jechu realizáu, pol ca alcuentru habíu, pol ca espaciu vesitáu, pol ca intri esprimentáu. Agraecíu pol ca sueñu teníu, pol ca proyeutu consiguíu. Agraecíu pol toínu cuantu lati... po-los mis latíus, pol el mi miejón.
Bienviníu 2011.