Etiquetas

lunes, 14 de noviembre de 2011

Nutru

Nutru el pechu
con arcu iris d’ojas
de la montaña


Photo by Antòniu

Al ispiertalmi

Al ispiertalmi...
descubru milentus coloris
ena mi ventana



Photo by Antòniu

jueves, 3 de noviembre de 2011

El sinificáu de los latíus


Preguntu pol el sinificáu de los latíus a la nochi…
y alcuentru la respuesta n’el reposáu latil
d’un múu murgañinu.

Photo by Antóniu

miércoles, 19 de octubre de 2011

I love you... Sun

Saboreu enos bezus
ateláus de sedi d'Universu
de los mis latíus,
los tus lubricanus...
T'amu Sol.
Photo by Antòniu

jueves, 22 de septiembre de 2011

Néctar

Sol.
Acoju la tu luci y la tu calol,
comu sacru néctar que me nutri...
Amáu pairi Sol.
*Photo by Jankovoy

Bóvidu y montaña


*Photu by Antòniu

TORUS?... NO, AGRAECÍU

   En más d’una ocasión, angunu me jiḍu una pregunta: ¿Te gustan los torus? A lu cualu hei díu respondiendu: "Sí, veleí, son unus animalis lindus abondu"... siempris m’alcontré caras de sorpresa y polémica cuasis sigura.
Una veci, cuandu era ḍagal, púi dinguelal endi cerquina los ojus d’un toru agonizanti en una praza d’un pueblu… con el escandalosu charcu de sangri de costumbri, arreol. La mirá ‘el animal nu mentía: ¡Espresaba una tristura esgarraóra! (los torus sientin mesmamenti). Endi altoncis lu vidi craru:
Sí, me merecin respetu aquellas presonas que pol mé la tradición, la cultura, etc. aman la tauromaquia peru muchu más respetu y consideración me mereci el toru qu’ al fin y al cabu es criáu pa finalmenti sel torturáu cruelmenti y asesináu... pa esparigilsi el presonal. Velailu.
Se puéi doral la píldora de continu jerri que jerri con alusionis y metáforas que puéin dil endi el minotauru de Creta jasta Picasso, pasandu por razonis históricas, económicas u d’identidá peru se miri como se miri cualisquiel “festeju” taurinu (cualisquiá, sin esclusiónis) es una salvajá injustificabli e injusta.
¿Libertá pa los que desean corrías de torus? Si juesi con feguras de cartón… ¡pol supuestu! ¿Qu’hai de la libertá y la dinidá de los astáus?
¿Sensiblería?... Metánsi n’el su pelleju.
¿Que l’adrenalina de la “lidia” lus rejuyi el dolol?... improbabli. En to casu… ¿justifical d’igual móu la padecencia minguá po-la hipersecreción adrenalínica frutu ‘el miéu a la batalla, d’un muchachuelu (recrutáu si cabi po-la juerza) con metralla n’el pechu? ¿justifical de pasu el ejerciciu sin sintíu, legalmenti institucionalizáu, de la guerra?... Las comparancias nu siempri son odiosas.
Es prejisu dil p’lantri: No a la briega de gladiaóris, no al esclavismu, igualdá de sexus, no al racismu, justicia social... abolición ‘el maltratu animal… y ya poníus, abolición de la guerra y defensa planetaria. Pol cima d’estéticas y “concepcionis artísticas”.
A sabel, toínus los seris vivus semus igualis, semus ijus de la Mairi Tierra... bóvidus y homo sapiens incluyíus… pol muchu que mus queramus miral el umbrigu.
Y, en efeutu es comprensibli qu’un indiu Yanomami o un Inuit caci… lu mesmu que jaḍi el león, el lobu u la lúndriga. Esu es supervivencia.
Algotru día, se puéi palral de las virtudis ‘el vegetarianismu.


*Internet photo

miércoles, 31 de agosto de 2011

Pairi Sol...

Mar, Sol y Homo Sapiens

El sel humanu, asina toínu sel vivu d’esti praneta,
veleili… es Augua más Sol.
L’augua jaḍi,
el Sol nutri.

lunes, 1 de agosto de 2011

Amiga... t'alcuerdas?


T’alcuerdas amiga, de la juerza de los mis latíus en brincandu n’el pechu, en sublimis lubricanus de gaviotas libris… renti ti? T’alcuerdas ‘el roci de los mis bezus acogiendu las fragancias ‘el tu alientu? T’alcuerdas ‘el regilanti tactu ‘el mi pelleju en acariciandu el tu impetuosu cuerpu? T’alcuerdas ‘el mi jocicu múu y los mis oyíus eternamenti abiertus a los seductoris murmullus de la tu voci? T’alcuerdas de las mis mirás perdías ena inmensidá de los tus ojus… locamenti namoráu de ti?
T’alcuerdas, amiga mar? Amiga mar ausenti.

*Photo by Antòniu
Amiga mar (Praya de Baroña)
Alba, Alán, Arturo y Sergio
Gaviota navegandu n'el Oceanu Cielu
Lubricanus ena praya de Baroña
Alán, Alba y Carmela ena mar
(Esteiro)
El jombri y la Mar
Gaviota
Lubricanus ena Illa de Arousa
*Photo by Antòniu
Illa de Ons

viernes, 1 de julio de 2011

bebiendu Universu

Tendíu sobri el praneta Tierra, po-la nochi, contemplu la inmensidá ‘el Universu ena cúpula celesti empreñá d’estrellas.
Una estrella fugaci, roza los bezus de los mis ojus… y me la bochincheu.
¿El mi deseu?... Velaquili, cumpríu.


Photo Internet

miércoles, 15 de junio de 2011


Photo Internet

Ñíu Universu

Volal comu gaviota libri
jacia el ñíu Universu,
rozandu conas alas
un eclipsi total de luna...

(Pa Red)




Photo Internet

domingo, 29 de mayo de 2011

Planeta enteru...



Dispuesinu de subil a un altu monti, me tumbu en metá ‘el suelu y veu velocis nubis navegandu ena inmensidá ‘el Océanu Cielu Azul. El Sol acaricia la mi frenti con suol, alimentandu al corazón… y me veu a mí mesmu, microscópicamenti giganti, sobri la reondé ‘el planeta Tierra, arrecogiendu la compaña de toínu cuantu m’arrodea. Largu quea esa imagin que todu sel vivu fabrica a veḍis elantri ‘el supuestu muru esistencial, d’irreparabli joyancu en soledá. Simplementi, me igu: “La soledá nu esisti, mus acompaña el planeta enteru”




jueves, 19 de mayo de 2011

Vieju sauriu

El vieju sauriu…
caëzu d’azul cielu,
cuerpu ‘ primavera.




Photo by Antòniu

miércoles, 18 de mayo de 2011

Los deus 'el sol


Los deus ‘el sol
abrazan la montaña…
debujandu manu
 


Photo by Antòniu

lunes, 16 de mayo de 2011

Planeta Frol



Gota d’augua
n’el cuerpu d’insectu...
Planeta frol
Photo By Antoniu


Acoju

Acoju el abrazu de los últimus rayus ‘el Sol tendíu en metá la yelba, mentris descubru a la luna lejanamenti cercana n’el cielu azul coroná pol floris colol d’oru. Y soi coscienti de la importancia de sintilmi parti integranti d’esti fértil praneta… d’esti inmensu Universu.
Tuínu lu demás es insinificanti.


Photo by Antòniu

jueves, 28 de abril de 2011

La palabra 'el día


La palabra ‘el día, residi n’el sol.
El silenciu es la voci,
los latíus el senderu.
(En homenaji a Jurso...)

Photo by Antòniu

viernes, 22 de abril de 2011

miércoles, 20 de abril de 2011




Amal más… toínu.
Bebel vida.









Photo by Antòniu

lunes, 18 de abril de 2011

Sel primavera tamién...

   Percebu la llegá ‘ la primavera una veci más, dispués ‘el largu letargu d’hivielnu, comu un miragru de regeneración y vida: En ca frol, en ca yelbina, en ca broti d’ árbul, en ca movimientu de los animalis, n’el soníu ‘ la corrienti d’ augua.
Percebu en mí mesmu, quiciás, un tiempu de simbiosis con’el estrumpiciu de lus y colol de la naturaleza… una oportunidá pa fundilmi y crecel con la efusiva creatividá generalizá qu’ofreci generosa la Mairi Tierra.
Es prejisu sintilsi parti integranti ‘el procesu estacional en cursu y autuoservalsi. En cuantu a lu qu’aconteci agora, es prejisu jaḍel revertil todu el verdi vital que surgi de nuevu impulsáu po-la sangrí ‘el Pairi Sol, n’el propiu miejón… latil en clorofila y lus. Aireal el pechu, aclaral la frenti que camina.
Simplementi mirandu y sintiendu to cuanto mus arrodea.
Sel primavera tamién.

photo by Antòniu

jueves, 14 de abril de 2011

Retengu...

Retengu en un intri ena retina, n’el tactu, n’el alientu, enos latíus…
Al Universu enteru:
Fugacimenti eternu… eternamenti fugaci.


*Photu by Antòniu