jueves, 19 de mayo de 2011
miércoles, 18 de mayo de 2011
lunes, 16 de mayo de 2011
Acoju
Acoju el abrazu de los últimus rayus ‘el Sol tendíu en metá la yelba, mentris descubru a la luna lejanamenti cercana n’el cielu azul coroná pol floris colol d’oru. Y soi coscienti de la importancia de sintilmi parti integranti d’esti fértil praneta… d’esti inmensu Universu.
Tuínu lu demás es insinificanti.
jueves, 28 de abril de 2011
La palabra 'el día
La palabra ‘el día, residi n’el sol.
El silenciu es la voci,
los latíus el senderu.
(En homenaji a Jurso...)
viernes, 22 de abril de 2011
miércoles, 20 de abril de 2011
lunes, 18 de abril de 2011
Sel primavera tamién...
Percebu la llegá ‘ la primavera una veci más, dispués ‘el largu letargu d’hivielnu, comu un miragru de regeneración y vida: En ca frol, en ca yelbina, en ca broti d’ árbul, en ca movimientu de los animalis, n’el soníu ‘ la corrienti d’ augua.
Percebu en mí mesmu, quiciás, un tiempu de simbiosis con’el estrumpiciu de lus y colol de la naturaleza… una oportunidá pa fundilmi y crecel con la efusiva creatividá generalizá qu’ofreci generosa la Mairi Tierra.
Es prejisu sintilsi parti integranti ‘el procesu estacional en cursu y autuoservalsi. En cuantu a lu qu’aconteci agora, es prejisu jaḍel revertil todu el verdi vital que surgi de nuevu impulsáu po-la sangrí ‘el Pairi Sol, n’el propiu miejón… latil en clorofila y lus. Aireal el pechu, aclaral la frenti que camina.
Simplementi mirandu y sintiendu to cuanto mus arrodea.
Sel primavera tamién.
jueves, 14 de abril de 2011
Retengu...
Retengu en un intri ena retina, n’el tactu, n’el alientu, enos latíus…
Al Universu enteru:
Fugacimenti eternu… eternamenti fugaci.
Alcuentru vegetarianu
El sábau 9 d’abril hubu un alcuentru ena finca Saranán , n’el paraji Lanchu Cabrera de Jaraiz de la Vera.
P’allí mus ajuntamus una tupa amigus y amigas de la comarca de La Vera (cuasis siguru más d’un cientu), pa disfrutal d’una comía vegetariana… y si cabi tamién pa compartil el amol jacia la Mairi Tierra y la busca d’una coerencia esistencial.
El encravi era maníficu, arrodeáu de bosquis y cerezalis en frol. Un estrumpiciu de primavera generosa en verdi y sol, mus jiḍu compaña to’l día..
N’el eventu, puímus nu solu saboreal suculentus manjaris (jechus sin dúa con muchu cariñu) y de la naturaleza… sinu mesmamenti compartil los muestrus latíus y los de los muestrus hijus e hijas, con’el latíu ‘el planeta representáu n’el suelu que pisábamus en aquellos momentus.
Sel vegetarianu/a u veganu/a, es una válida opción nu descogía de baldi. Es el frutu d’una filosofía de vida… de sel y estal.
A menúu, cuandu una presona decidi librementi sel vegetariana, s’ alcuentra ena tesitura de tenel qu’estal dandu esplicacionis de continu (comu si el preferil alimentalsi rejuyendu la chicha juesi asuntu de bichus ralus). P’al mi conceutu, es tan simpli comu recurril a saluáblis alimentus que mus ofreci la Mairi Tierra… respetandu el drechu a la vida y la dinidá de los muestrus compañerus de viaji planetariu: Los animalis.
Agraecíu a toínu/as po-la jorná… ¿Ondi imus pa la prósima?
lunes, 4 de abril de 2011
Andu en cata l'atardecía
Andu en cata l’atardecía, namas que pol arrecogel los últimus rayus de Sol, comu un tesoru qu’ajuyi un diína más… p’habel nacencia a l’amanecía. Y puéu velmi a mi mesmu mirandu clisaítu los sus ojus cegaóris, locamenti namoráu d’él.
.
Queríu amigu Jursu
Dioh, muestru… ¿pol qué a veḍis es tan dura la esestencia? ¿pol qué tantus aginaerus pa los ojus y los corazonis de los tus jixus y las tus jixas? ¿Qué sentíu tieni toínu?... vivil, lo más gelmosu… es un privilegiu reserváu pa millonésimas de ráfagas d’esestencia anti la inmensidá ‘el tiempu y ‘el espaciu… un casual privilegiu… fugaci. Peru los corazonis latin con juerza, sientin con juerza jasta que se paran.
Las campanas ‘el relol dan las doḍi campanás… a Jursu… ya nu le quean ni doḍi latíus.
Amigu Jursu: Nu tengu lárimas para lloral la tu muerti, nu tengu palabras, nu sé ni qué pensal ni qué sintil… solu tengu recordaérus renti ti. Recordaerus ‘el tu amabli gestu, de la tu generosa compaña, ‘el tu sonriyil, de la tu mirá, ‘el tu ton de vó, de los tus indómitus cabellus, ‘el tu inconformismu solidariu, de la tu autenticidá, de las tus juertis manus, de los tus ágilis piesis, ‘el tu inigualabli sabel sel y estal… de la tu amistá. Nu puéu creelu, arrejuyi lu mejol de lu mejol.
Esta nochi to la cúpula celesti ha apagáu las sus millonis de galasias en este rinconcinu ‘el Universu… amigu Jursu. Nu quieru ni pensal n’el corazón esjarráu de la tu mairi.
Nu quieru pensal… amigu, amigu… irreparablementei amigu.
(28-marzu-2011)
sábado, 26 de marzo de 2011
viernes, 25 de marzo de 2011
Desliciu la mi mirá pol el canchu, asperandu namas dureza pétrea, insensibli e inerti… y ena selva de las menuencias, descubru al mesmu Sol que regala savia a los mis latíus, en jorma de liquin silenciosu.
Y soriyu, mentris reconozu enas mis arreiḍis unus piesis con drechu a agilal… y el gritu ‘el mi miejón se dilui n’el ecu d’un mundu de millonis de millonis d’almas que tamién latin.
lunes, 21 de marzo de 2011
miércoles, 16 de marzo de 2011
Esta mañana juími un ratinu en silenciu, renti los piesis de la gelmana Montaña.
Ráfagas de vientu fríu acariciaban cálidamenti la mi faci.
Con los mis deus jiḍi la silueta d’un corazón y encuadré drentru los picus más altus cubríus de nievi…Ejandu qu’el vientu se cuelara pol esi güecu y que jundeara el ecu ‘ los mis latíus jasta el monti Fuji Yama.
Y le susurré aspacinu en los sus oyíus, endi largu:
−¡Amigu, aceuta una mijina d’airi puru de p’aquí y que quéi limpiu el tu cielu!
¿A anguien más se l’apeteci endirgal un sopru de frescancia pa’l Fuji Yama?...
Que l’endirgui palabrus ‘el corazón con’el gelmanu vientu.
sábado, 12 de marzo de 2011
Dura Mairi Tierra
¡Qué chiqueninu el sel humanu elantri la juria desatá pol el planeta ena más mínima sacuía ‘el su pelleju! ¡Cuánta desolación en escasus segundus!
Es inevitabli percebil agora a l’amá Tierra comu una despreocupá mairi qu’abandona a los su s’ijus n’el joyancu.
Es inevitabli la comparancia con un ḍagalinu malu qu’arrejaḍi la llamaretá d’ un fósforu a la entrá d’un jolmigueru, namas pol el prazel de vel retorcelsi a las probis jolmiguinas en la su combustión. Es inevitabli sintilsi frágil, pendiendu d’un jilinu de tela de morgañu que cualisquiá sopru d’airi caprichosu puéi segal… en cualisquiá intri. Es inevitabli nu rejuyil la mirá de las sombras de las gelmanas y gelmanus que sufrin embaju el mesmu Sol.
Ya sé Mairi Tierra, que tú acontinas con el tu caminu. Ya sé que tú nu jas distincionis:
Asína una jolmiga… Asína musotras y musotrus mesmus.
La nación ‘el Sol nacienti regila y llora.
viernes, 11 de marzo de 2011
En Monfragüi y el Lagu de las grullas
Jaḍi unus días, mus juimus p’al Parqui de Monfragüi aprovechandu una jeria d’ornitología. Deseguía mus punimus en un senderu y mus perdimus po-las projundidadis ‘el enclavi camufláus po-la esuberanti vegetación.
El Sol lucía con juerza quiciás comu preludiu d’una primavera que quieri asomal el su jocicu bichaol, desanditu d’estrumpil en coloris y vida… y la verdá, s’ agraecía en dispués de mesis de fríu y nievis.
Anguien gritó
-¡Mirái p’al cielu!
Milis de grullas lo sulcaban jaḍiendu uvis, de nuevu caminu ‘el norti d’ Europa.
Altoncis propuní…
-¿Pol qué no mus imus p’al lagu de las grullas a espiílmus de las nuestras amigas jasta el añu prósimu, enantis de que se vaigan toínas?
Y asina jue. Cuandu llegamus, el silenciu de las auguas y l’ausencia ‘el escandalosu diálogu de las grullas, mus alertó de la su día definitiva… y cierta malinconía invadió al espaciu, ya sin ellas.
A pesal de todu, la vida jervía en Tierra, Augua y Airi.
Y el Pairi Sol mus acarició una atardecía más, enantis de juegal al escondichi.
sábado, 5 de marzo de 2011
Ascuchal...
Ascuchal el latíu 'el Universu en toínu cuantu lati,
ascuchal el propiu tamién... y sel conscienti
viernes, 4 de marzo de 2011
jueves, 3 de marzo de 2011
miércoles, 2 de marzo de 2011
Alquimia esistencial...
La busca de la plenitú esistencial, pasa, enantis de na, po-la integración con el mediu que mus dio la vida y que mus haberá d’acogel n’el su senu. Pasa po-l’asimilación de l’alma de la Mairi Tierra, pol el mimetismu n’el miejón, con la Naturaleza (n’el su más ampliu sintíu).
Nu emporta ni el lugal ni el momentu, lu qu’emporta es sintilsl parti integranti ‘el Planeta… sintilsi un eslabón más ‘el ecosistema y gozal d’esi status. Compartil, disfrutal de la espresión de toínu lu vivu amás de los fenómenus naturalis: de ca sel humanu, de c'animal, de ca pranta, de ca gota ‘ lluvia, de ca copu ‘ nievi… de ca cuerpu inerti tamién.
Y sabelsi pereceéru, pereceéra, po-lo menus n’el planu físicu… entendelu y aceutalu con dinidá. Compartil el devenil de to los gelmanus y gelmanas animalis y prantas. Almiral ca rayu ‘sol que mus alumbra y desapaeci jasta que vieni algotru, de ca fasi de luna que da pasu a algotra... adeprendiendu.
Pol otra parti, el verdaeru viaji de la esestencia es el viaji de drentru … siempri, comu no, en concordancia íntima con'el Hábitat.
Es prejisu sintil, sintil po’ncima de todu, sintil el latíu de todu en to momentu, sintil los propius latíus. Es prejisu acogel la energía ‘el planeta en toínu cuantu aconteci. Es prejisu prantalsi elantri ‘el horizonti ca mañana y dali gracias al Pairi Sol pol habel nacencia. Velu escuendelsi a l’atardecía… y iḍili: ¡Hei, velaquili estoi yo!
Es prejisu vel surgil la cúpula celesti preñá d’estrellas, po-la nochi. Alimentalsi de la grandiosidá ‘el Universu, al cualu pertenecemus en cuerpu y alma.
Y amal, sin más.
*Photo by Antòniu
Suscribirse a:
Entradas (Atom)