*Photo by Antòniu
viernes, 18 de febrero de 2011
lunes, 14 de febrero de 2011
Paseandu
Paseandu la mi hija, alcuentra un ratoncinu moribundu. Lu deposita en las sus manus percebiendu los sus últimus latíus... conmovía po-la su belleza. El probi animal, n'el su lechu de muerti, agraeci mesmamenti el calol humanu.
martes, 8 de febrero de 2011
Gelmana árbul
Gelmana árbul:
En silenciu, m'atalantu sobri la yelba en metá la gelmandá 'el bosqui
y en la tu estática libertá, percebu con juerza los tus latíus...
Pairi Sol mus susurra al oyíu, enantis d'escuendelsi ena montaña.
*Photo by Antòniu
Femme arbre
lunes, 7 de febrero de 2011
¿Helioteísmu?...
Las manus ‘el Sol acarician la mi faci
enantis d’escuendelsi ena montaña,
la gelmandá ‘el bosqui lati megu en silenciu,
el cánticu de la corrienti d’augua es el elisil de la eternidá...
*Photo by Antòniu
domingo, 6 de febrero de 2011
Sorprendentis imáginis 'el Sol
Toínu el Sol en una única imagin, pol primel veci
Dos sondas espacialis de la NASA, de la misión Stereo, están agora oservandu el Sol endi las sus respetivas posicionis a 180 gráus de distancia una d’otra, es iḍil, ca una a un láu ‘el astru y, fotografiándulu a la veci, han consiguíu la primel imagin completa de to-la superficii solal. La capacidá de diquelal al mesmu tiempu las dos caras ‘el Sol premiti jaḍel un siguimientu a concencia de la estrella y mejora notablimenti la predición de la su actividá.
*PD. Si vus apeteci, abréi esti enlaci, jurucheái una mijina y acontinái abriendu enlacis drentru… ¡Impresionantis imágenis ‘el Sol en movimientu!
http://stereo.gsfc.nasa.gov/Miéu al homo sapiens
*Photo by Antòniu
Pol pocu que s’analici la interrelación entri los animalis y el sel humanu se puéi llegal a una conclusión evidenti: los animali tienin miéu ‘el sel humanu. Cualisquiá bichinu, reptil, avi, peci, vertebráu u mesmamenti gran mamíferu dotáu con potentis defensas, ajuyi espavoríu en cuantis barrunta al homo sapiens… ¿Pol qué será?
Y el miéu es malu, mu malu, quiciás el sentimientu más escachinaol e innobri: miéu a los pairis, miéu al maestru, miéu al maríu u la mujel, miéu al invasol, miéu al gobernanti, miéu a la muerti, miéu a Dioh… ¡Ah!... me se olviaba arrecordal, los animalis tamién sientin.
¡Que demoleol y tristi que los nuestrus gelmanus ena esestencia mus perceban y cataloguin endi el pánicu!
Se puéi entendel qu’el australopithecus, el homo erectus u jasta el mesmu homo sapiens impuniera la su juerza bruta en un mundu ajostigaol primitivu… pol pura sobrivivencia. Se puéi entendel qu’un neandertal cazasi Mamuts, qu’un indiu yanomami caci un caimán y un Inuit una foca… peru ¿cómu justifical tanta prepotencia y crueldá jacia otrus seris vivus? ¿Cómu justifical el maltratu animal sistemáticu e indiscrimináu? ¿Cómu justifical a nivel planetariu el holocaustu d’especiis pol puras ambicionis espansionistas y económicas? ¿Cómu justifical la caza indiscriminá pol pracel; las brutalis tradicionis comu el toreu, la briega de gallus, las mutilacionis y sacrificius violentus d’animalis, los festejus popularis aberrantis, etc? ¿Cómu justifical la industria alimentaria mundial con un engranaji de macruprodución qu’al día sentencia a millonis y millonis de gelmanus animalis al hacinamientu, al sufrimientu continu y al asasinatu, al fin y al cabu?
Se supon que la sociedad actual agila jacia la democracia y la justicia peru entovía hai algu emportante abondu pendienti de revisal: la nuestra convivencia con los animalis (y prantas) y el respetu a la su dinidá.
Si los probis animalis juesin escapacis de palral en humanu, gritaríen al unísonu: !!!LIBERTÁ ANIMAL¡¡¡
Peru lu peol de todu es el miéu ‘el homo sapiens al homo sapiens, de lu cualu jablaremus algotru diína.
Blog recomendáu: El museo de la luna ( http://moon-museum.blogspot.com/ )
Libru recomendáu: "Todos los animales somos hermanos" (Jorge Riechmann)
Libru recomendáu: "Todos los animales somos hermanos" (Jorge Riechmann)
sábado, 5 de febrero de 2011
Acaricial...
Acaricial al Sol con manus de muchachinu,
Acaricial al pechu con rayus de Sol…
*Photo by Antòniu
lubricanus y vida
Ayel, a l’atardecía, juimi a dal una güeltina renti un lagu cercanu. En los lubricanus, el Sol regalaba a toínu una alucinanti luh anaranjá. Un estrumpiciu de vida s'espetaba elantri mí: milentas espectacularis grullas llegandu en oleás pa pasal la nochi, cientus de patus silvestris, aguanievis, gaviotas, cigüeñas, liebris gigantis orejúas… y enas auguas, una tupa pecis jaḍiendu voltarinas en los sus saltus.
En un intri, me queé paráu pensandu y dími de cuenta de qu’a pesal de lu idílicu ‘el momentu, en realidá, to-las criaturas ajuyían de mí… miéu al homo sapiens!. Intenté altoncis dil mu aspacinu ocultándumi entri los árbulis peru el Sol a puntinu d’escuendelsi me delataba a ca pasu con la mi sombra quilométrica en movimientu. Cuandu el Sol s’hubu metíu totalmenti, un conmoveol jervieru de grullas bullía al mi arreol peru to-las bandás, asigún diban arribandu, en cuantis me barruntaban endi largu… daleaban el su vuelu pa esquivalmi.
Esprimenté tumbáu quietu n’el suelu intentandu mimetizalmi en metá la incipienti escuridá y mesmamenti asina m’andaban evitandu.
Yo quería sintilmi unu más, pasal desapercebíu, integralmi… peru algu fallaba, de basi. Dispuesinu, una carrefila colorá n’el cielu ‘el horizonti, el primel luceru y un jilinu de Luna crecienti… mus igualaba a todus.
Jue una linda tardi.
viernes, 4 de febrero de 2011
Olé, Patricia!
L'actrici panameña Patricia de León posa asina pa PETA (People for the ethical traetment of animals). Linda imagin... nobli gestu. Es emportanti abondu que la nuestra sociedá vaiga agilandu p'lantri n'el respetu a la dinidá de toínus los animalis... homo sapiens incluyíus.
.
jueves, 3 de febrero de 2011
¿Arti orgánicu estremu?...
Navegandu po-la redi, descubru qu’ un artista (?) de 34 añus montó jaḍi angún tiempu una esposición de lu qu’él denomina “Arti orgánicu estremu”, en una sala alternativa de Cazris. Pa’l eventu tuvu la ocorrencia de jincal cientus de grillus vivus en lienzus disponíus enas parecis. Po-lo vistu, la manifestación artística consistía en mostral el macabru y desesperáu pataleu de los probis animalinus duranti la su lenta agonía. Menus mal qu’una horrorizá mujel juesi pa la su casa a pol un insecticía pa dal una dina muerti a las criaturas… Dispuesinu, la esposición queó clausurá.
El artista (?) iju al tentu : “Esa mujer ha actuado como un talibán, cercenando las libertades creativas y culturales. Hay gente que se ha molestado, pero son los que no van con una mente abierta; los que no saben ir más allá”, “lo que busco es que el espectador entienda que igual que los grillos están pegados, él está pegado a unas reglas sociales, al mundo, sin ser consciente de todo lo que se está terminando cada instante”. “No pueden sufrir porque no tienen sistema nervioso. Es como cortar una planta. Por otra parte, yo estoy en contra del maltrato animal”... En fin, arrejundin las palabras.
Qué fácil es atrevelsi con mil grillinus de na… ¿verdá?
Qué fácil es atrevelsi con mil grillinus de na… ¿verdá?
Qué provechosu aprovechal el tirón mediáticu de la polémica pa’l jundeu artísticu presonal... ¿verdá?
¡Patéticu!
Se puéi creal, creal belleza, sirviéndusi de cuantu ofreci la Mairi Tierra peru con projundo respeitu y ejandu arrematal rigurosamenti los ciclus vitalis.
¿Esu es arti? Esu es: fusca. Arti, es el cantu d’un grillu en metá una nochi de vranu anti la inmensidá de la cúpula celesti preñá de galasias.
sábado, 29 de enero de 2011
jueves, 27 de enero de 2011
viernes, 21 de enero de 2011
Mar y Caipirinha
¿Acasu emporta la nomenclatura de Dioh? ¿Pol qué no, Energía Universal Divina… y millonis de seris con entidá propia?
Y sí, libertá de creu… tamién Derechus Humanus y Nu Violencia.
Las especiis, las etnias: son espresión viva 'el latíu universal en ca rincón 'el planeta… más allá de jormas, rasjus u facetas.
¿Géneru, hábitat, tribu, ciudá, nación, planeta... acasu galasia? ¿Qué más da óndi u cuándu? Lu emportanti es la calidá del cómu. Toínus semus igualis, gelmanus ena supervivencia y l'adaptación.
Velequíli, a idil verdá, el Sol, es una juenti que regala pol igual l'augua cristalina de la esistencia a los sus hijus (¡que tienin sedi de latíus!)... es un pairi qu'ama pol igual a cuantu nutri.
Es prejisu sintil al Sol, pol cima todu. Sintilu y sintilsi.
Musotrus, los humanus, mus creemus superioris, con drechu a dominal, a esplotal, a esterminal… si es prejisu a otrus seris humanus. Mesmamenti, habemus legalmenti istitucionalizá la guerra ondi vergonzosamenti s' envía a la frol y nata, en plena joventú, a'spichal el poleu pol bobás y paranoias de cuatru ilumináus... y la brutalidá de los efeutus colateralis.
Sobri to, semus tamién animalis… y un poquinu prantas, si cabi.
Semus un eslabón más del ecosistema, de la evolución, de la biodiversidá
Toínu sel vivu meredi projundu respetu y consideración, más allá de lu diferencial u de la mayol u menol capacidá alquiría de defendelsi: ca homo sapiens, c'animal, ca pranta… tamién lu inerti.
Pol otra parti, La Tierra lati con juerza. Es la mairi que mus amamanta.
¿Pol qué l'ajostigamus tantu? (…)
−Eh!, amigo!. Deseja você comer alguma coisa?... caldo carioca, bacalhau grelado, frango com batatas ? morango e nata? Pra beber… Gosta você duma caipirinha?.
Ispiertu de la ensoñación prevocá po-la inmensidá 'el océanu embraveciu, que m'envuelvi a través los cristalis mojáus po-la lluvia. Emerju de las projundidadis de la melodía afru-zen-brasileira que suena, sentáu en un tabureti renti una estufa de carbón… ¡Ah!, y'arrecuerdu, estoi n'el bal “Belo Horizonte” de Figueira da Foz… Por fin miru pa la pizarra de menús y respondu al camareru:
−Sim… amigo… duas batatas ao forno, pão de milho, manteiga de cacau, morango com nata e xerope de maracuiá e... pra beber, uma caipirinha com muito gelo, ron torrado e limões selvagens das Caraibas. Obrigado.
domingo, 9 de enero de 2011
Ejal
Ejal fluyil la esestencia, asina pruma mecía pol el vientu. Atesoral el propiu miejón. Que los latíus sean la guía de la frenti qu’agila. Dal sin pretendel, recebil agraeciendu. Arretenel tan solu la indispensabli presencia ‘el Universu. Comprendel definitivamenti que la soledá nu esisti… sinu inseguridá, reconcomeéru y egu. Rejuyil el miéu, rejuyil la culpa. Nu renuncial al drechu a erral ni al don de nu sel perfeutu. Sel emocionalmenti autosuficenti, suficientimenti emocional.
Piesis p’apalpal, manus p’andal, oyíus pa jablal, jocicu p'ascuchal, ojus pa latil… corazón pa vel. Crecel, creel, creal. Amal…veleili. Habel sueñus.
Ejal fluyil las alas.
Suscribirse a:
Entradas (Atom)