Redi

Ena atardecía jundeu la mi redi de cuerpus d’árbulis,

p’arretenel un intri al Sol

enantis de qu’ajuya… jasta l’amanecía.

photo by antòniu

Ñíu cigüeñas ena amanecía

Ena amanecía.

Inyetalmi, enas pupilas

una dosi de Sol

con alas de cigüeña…

en flipandu

a corazón abiertu

con latíus

de Mairi Tierra

photo by antòniu

photo by antòniu

Árbul

Agilu po-los territorius de la gelmandá ‘el bosqui. Agilu percebiendu entri la nébula las feguras majestuosas de los árbulis esnúus, percatándumi de la singularidá de ca un.

Ca árbul presenta un porti determináu, una distribución concreta ‘el su ramaji, un grosol y una jechura definía ‘el su troncu… un miranti, una altura.

Ca árbul tieni la su propia presencia y esencia.

Ca individu eja entrevel la su propia idiosincrasia… y nu puéu evital vel paralelismu conos seris humanus.

… sintilmi, afortunámenti, una mijirrinina árbul.

photo by antòniu

Acariciandu la silueta ‘el Sol

con deus de ḍagalinu

y corazón d’árbul… 

photo by antòniu

La dama de la nievi

La dama de la nievi vinu jaḍi aguninus días po-la montaña, desparciendu con la su barina mágica miejón brancu. La nuestra casa, el bosqui, los pláus… toínu uníu pol el brancu.

Mesmamenti los nuestrus perrinus, de pelaji supuestamenti albu, escurecin ante el destellu de la nievi... mesmamenti la lechi que lambin n’el su pratu.

Jagu con los ḍagalis un muñecu nievi, imus en trineu… enantis  qu’el abrazu ‘el pairi Sol julmini la juéyiga d’esencia branca de la dama de la nievi.

photo by antòniu

Us cabalus

Us cabalus, sortus pur u bosqui,
me train recordus...
recordus, de cuandu u homi era libri.
(Fala de Xálima)

Latíus

Veu el latíu de la Mairi Tierra,

tamién, ena suponía decrepitú ‘el hivielnu…

enos cuerpus esnúus de los árbulis

asperandu primavera.

Veu el latíu ‘el Universu,

enos lubricanus ‘el Sol

que desparcin sangri

sobri el horizonti.

Veu los mis propius latíus

enos mis ojus satisfacíus…

enos mis pasus.

Vientu

 El vientu gélidu ‘el ivielnu

susurra cálidamenti al pelleju

al abrigu d’un planeta qu’agila,

inesorablimenti,

pa ofrecel el refrescanti susurru

de cualisquiá día abrasaol ‘el veranu… 

Paseu po-lo bosqui

Agilu en metá la hermadá 'l bosqui
sintiendu con los mis piesis
el tactu cálidu de las vestiúras de los árbulis
jundeás p'al suelu.
Y los mesmus copinus de nievi
qu'acarician a los sus cuerpus esnúus...
acarician a la mi cara.

photo by antòniu

Navegandu

Navegandu 
el Universu enteru
en una gotina de lluvia...

photo by antòniu

Latiendu con corazón d'alas

Volandu con alas 

de corazón...

latiendu con corazón

d’alas.

painting by antòniu

Güenas nochis, blog

Retomu el mi blog dispuesinu d’una tupa mesis múu.

¿Pol qué?... nu sé bien, quiciás puru tiraeru creativu. Quiciás sea esta toñá lluviosa qu’ invai toínu ya de desbordanti coloríu y prevoca. Quiciás es, velaili, él en retomándumi.

Al fin y al cabu... Es lu mesmu,

 Nu pretendu na, nu asperu aprebación de naidi... tan solu abril nuevas páginas. Si cabi atesorar ecu de corazón n’el mi cuadernu… humildimenti esti blog.  

photu by antòniu