Rishikesh, en metá las montañas, renti al sagráu Gangis. Una tupa templus con las sus divinidadis y una tupa comercinus. 
Po-la mañana, mus imus aína abondu pa un monesteriu ena montaña, dendi ondi se puéi vel el Himalaya. Contemplu la nacencia 'el Sol, aluegu jaḍemus a pie una encantaora ruta de 17 km de descensu: aldeínas entri montañas, arrozalis, ḍagalas con ajocis, pastoris, lorus, una chorrera d'auguas cristalinas, monus...

Velallíli solu silenciu, nu ruíus, nu fusca. Se percibi más armonía y riquecia real qu'enas ciudadis. Ena naturaleza toínu paeci tenel sentíu.

En llegandu de nuevu a la ciudá, descubru una galería de cuadrus realizáus con pigmentus naturalis pol mujeris d'una aldea. Ajaj, el amabri ḍagal que la dirigi, m'enseña a obtenel angunus pigmentus d' hojas y cortezas d'árbul.

Po-la tardi, una güeltina en barca pol el Gangis. Enas sus riveras, los muchachinus se buscan las jabichuelas vendiendu velas con froris pa ejalas n'el ríu, en honol d'anguna presona. Lalta, unu d'ellus, es ispiertu, alegri y listu abondu (piensu cuantu valoraríe tenel la oportunidá de puel habel accesu a los estudius). Me vendi anguna d'esas velinas con froris que eju enas auguas 'el ríu, dispuesinu palramus un ratu y jaḍemus ranas n'el augua con pieiras.

Posteriolmenti contemplu una linda puniúra de Sol, ampié'l ríu. El Sol, paeci muchu más grandi de lu habitual... mesmamenti consigu fotugrafial anguna mancha solal con'el zoom de la mi cámara.

Al desotru, otra escursión a la montaña entri bosquis ondi vivin tigris y elefantis asigún iḍin.