Miéu al homo sapiens

*Photo by Antòniu

   Pol pocu que s’analici la interrelación entri los animalis y el sel humanu se puéi llegal a una conclusión evidenti: los animali tienin miéu ‘el sel humanu. Cualisquiá bichinu, reptil, avi, peci, vertebráu u mesmamenti gran mamíferu dotáu con potentis defensas, ajuyi espavoríu en cuantis barrunta al homo sapiens… ¿Pol qué será?

Y el miéu es malu, mu malu, quiciás el sentimientu más escachinaol e innobri: miéu a los pairis, miéu al maestru, miéu al maríu u la mujel, miéu al invasol, miéu al gobernanti, miéu a la muerti, miéu a Dioh… ¡Ah!... me se olviaba arrecordal, los animalis tamién sientin.

¡Que demoleol y tristi que los nuestrus gelmanus ena esestencia mus perceban y cataloguin endi el pánicu!

Se puéi entendel qu’el australopithecus, el homo erectus u jasta el mesmu homo sapiens impuniera la su juerza bruta en un mundu ajostigaol primitivu… pol pura sobrivivencia. Se puéi entendel qu’un neandertal cazasi Mamuts, qu’un indiu yanomami caci un caimán y un Inuit una foca… peru ¿cómu justifical tanta prepotencia y crueldá jacia otrus seris vivus? ¿Cómu justifical el maltratu animal sistemáticu e indiscrimináu? ¿Cómu justifical a nivel planetariu el holocaustu d’especiis pol puras ambicionis espansionistas y económicas? ¿Cómu justifical la caza indiscriminá pol pracel; las brutalis tradicionis comu el toreu, la briega de gallus, las mutilacionis y sacrificius violentus d’animalis, los festejus popularis aberrantis, etc? ¿Cómu justifical la industria alimentaria mundial con un engranaji de macruprodución qu’al día sentencia a millonis y millonis de gelmanus animalis al hacinamientu, al sufrimientu continu y al asasinatu, al fin y al cabu?

Se supon que la sociedad actual agila jacia la democracia y la justicia peru entovía hai algu emportante abondu pendienti de revisal: la nuestra convivencia con los animalis (y prantas) y el respetu a la su dinidá.

Si los probis animalis juesin escapacis de palral en humanu, gritaríen al unísonu: !!!LIBERTÁ ANIMAL¡¡¡

Peru lu peol de todu es el miéu ‘el homo sapiens al homo sapiens, de lu cualu jablaremus algotru diína.

Blog recomendáu: El museo de la luna ( http://moon-museum.blogspot.com/ )
Libru recomendáu: "Todos los animales somos hermanos" (Jorge Riechmann)