Rishikesh, un nuevu diína.

Un paseu jasta el templu de la gigantesca estatua 'el dios monu pa dil a un Aarti ena puniúra 'el Sol. De retornu ya de nochi, en un intri, m'ajostiga ciertu sentimientu de... ¿tiraéru?, ¿soledá?.  M'embaigu un poquinu y acontinu agilandu angunus Kms pol un senderu solitariu en metá la escuridá.  Altoncis, puéu diquelal la nacencia d'una espectaculal luna plena coloraína n'el espesu bosqui, entri las lindas siluetas de los montis... y retomu el contauto con la Mairi Tierra y si cabi, con la mi propia esencia.

Ya toínu está bien. No problem.

Día 27 d'eneru, po-la mañana, sentáu en un canchu renti los rápidus 'el ríu Gangis. Arrematu d'arrepañal tierra arenisca y arena  pa los mis cuados, ampiecinu d'unus ñíus d'andurinas enanas.

Ena rivera d'enfrenti, una mujel lava n'el ríu... los sus jisus andan juegandu. Velequili, esóticus pájarus.

Hoi retornu a Delhi pa entallal el mi vuelu destinu Bruselas-Mairil, me s'apeteci miral duranti las horas 'el viaji jasta el aerupuertu. Dami penina ejal estu.

Estu se paeci una mijina a las gargantas de  la nuestra montaña... peru en giganti.

Agraecíu.

photo by antòniu

PINACOTECA

Pol el módicu preciu d'un paseínu, se puéi dil al grandiosu espectáculu de la pinacoteca de l'atardecía. El maestru Sol desparci las pincelás con ayúa 'el maestru vientu. Los lienzus?... el bosqui, la montaña, las nubis, el cielu..

Agilandu

HIVIELNU

Agilal po-la montaña al alcuentru 'el hivielnu enantis de qu'escomienci una nueva primavera.

Saboreal la luci radianti 'el Sol y el limpiu cielu azul. 

Oyel al silenciu y juegal con el ecu.

Ojeal pa unas cabrinas salvajis paciendu pacíficamenti en metá la praera.

Vel escuendelsi al Sol n'el bosqui acariciáu po-los sus últimus rayus anaranjáus... y la mi sombra alargá ampié 'el caminu.

En siendu,  en estandu.

photo by antòniu