photo by antòniu

Acariciandu la silueta ‘el Sol

con deus de ḍagalinu

y corazón d’árbul… 

photo by antòniu

La dama de la nievi

La dama de la nievi vinu jaḍi aguninus días po-la montaña, desparciendu con la su barina mágica miejón brancu. La nuestra casa, el bosqui, los pláus… toínu uníu pol el brancu.

Mesmamenti los nuestrus perrinus, de pelaji supuestamenti albu, escurecin ante el destellu de la nievi... mesmamenti la lechi que lambin n’el su pratu.

Jagu con los ḍagalis un muñecu nievi, imus en trineu… enantis  qu’el abrazu ‘el pairi Sol julmini la juéyiga d’esencia branca de la dama de la nievi.

photo by antòniu

Us cabalus

Us cabalus, sortus pur u bosqui,
me train recordus...
recordus, de cuandu u homi era libri.
(Fala de Xálima)

Latíus

Veu el latíu de la Mairi Tierra,

tamién, ena suponía decrepitú ‘el hivielnu…

enos cuerpus esnúus de los árbulis

asperandu primavera.

Veu el latíu ‘el Universu,

enos lubricanus ‘el Sol

que desparcin sangri

sobri el horizonti.

Veu los mis propius latíus

enos mis ojus satisfacíus…

enos mis pasus.

Vientu

 El vientu gélidu ‘el ivielnu

susurra cálidamenti al pelleju

al abrigu d’un planeta qu’agila,

inesorablimenti,

pa ofrecel el refrescanti susurru

de cualisquiá día abrasaol ‘el veranu… 

Paseu po-lo bosqui

Agilu en metá la hermadá 'l bosqui
sintiendu con los mis piesis
el tactu cálidu de las vestiúras de los árbulis
jundeás p'al suelu.
Y los mesmus copinus de nievi
qu'acarician a los sus cuerpus esnúus...
acarician a la mi cara.

photo by antòniu

Navegandu

Navegandu 
el Universu enteru
en una gotina de lluvia...

photo by antòniu

Latiendu con corazón d'alas

Volandu con alas 

de corazón...

latiendu con corazón

d’alas.

painting by antòniu

Güenas nochis, blog

Retomu el mi blog dispuesinu d’una tupa mesis múu.

¿Pol qué?... nu sé bien, quiciás puru tiraeru creativu. Quiciás sea esta toñá lluviosa qu’ invai toínu ya de desbordanti coloríu y prevoca. Quiciás es, velaili, él en retomándumi.

Al fin y al cabu... Es lu mesmu,

 Nu pretendu na, nu asperu aprebación de naidi... tan solu abril nuevas páginas. Si cabi atesorar ecu de corazón n’el mi cuadernu… humildimenti esti blog.  

photu by antòniu

Nutru

Nutru el pechu
con arcu iris d’ojas
de la montaña

Photo by Antòniu

Al ispiertalmi

Al ispiertalmi...
descubru milentus coloris
ena mi ventana

Photo by Antòniu

El sinificáu de los latíus

Preguntu pol el sinificáu de los latíus a la nochi…
y alcuentru la respuesta n’el reposáu latil
d’un múu murgañinu.

Photo by Antóniu

I love you... Sun

Saboreu enos bezus
ateláus de sedi d'Universu
de los mis latíus,
los tus lubricanus...
T'amu Sol.

Photo by Antòniu

Néctar

Sol.
Acoju la tu luci y la tu calol,
comu sacru néctar que me nutri...
Amáu pairi Sol.

*Photo by Jankovoy

Bóvidu y montaña

*Photu by Antòniu

TORUS?... NO, AGRAECÍU

   En más d’una ocasión, angunu me jiḍu una pregunta: ¿Te gustan los torus? A lu cualu hei díu respondiendu: "Sí, veleí, son unus animalis lindus abondu"... siempris m’alcontré caras de sorpresa y polémica cuasis sigura.

Una veci, cuandu era ḍagal, púi dinguelal endi cerquina los ojus d’un toru agonizanti en una praza d’un pueblu… con el escandalosu charcu de sangri de costumbri, arreol. La mirá ‘el animal nu mentía: ¡Espresaba una tristura esgarraóra! (los torus sientin mesmamenti). Endi altoncis lu vidi craru:

Sí, me merecin respetu aquellas presonas que pol mé la tradición, la cultura, etc. aman la tauromaquia peru muchu más respetu y consideración me mereci el toru qu’ al fin y al cabu es criáu pa finalmenti sel torturáu cruelmenti y asesináu... pa esparigilsi el presonal. Velailu.

Se puéi doral la píldora de continu jerri que jerri con alusionis y metáforas que puéin dil endi el minotauru de Creta jasta Picasso, pasandu por razonis históricas, económicas u d’identidá peru se miri como se miri cualisquiel “festeju” taurinu (cualisquiá, sin esclusiónis) es una salvajá injustificabli e injusta.

¿Libertá pa los que desean corrías de torus? Si juesi con feguras de cartón… ¡pol supuestu! ¿Qu’hai de la libertá y la dinidá de los astáus?

¿Sensiblería?... Metánsi n’el su pelleju.

¿Que l’adrenalina de la “lidia” lus rejuyi el dolol?... improbabli. En to casu… ¿justifical d’igual móu la padecencia minguá po-la hipersecreción adrenalínica frutu ‘el miéu a la batalla, d’un muchachuelu (recrutáu si cabi po-la juerza) con metralla n’el pechu? ¿justifical de pasu el ejerciciu sin sintíu, legalmenti institucionalizáu, de la guerra?... Las comparancias nu siempri son odiosas.

Es prejisu dil p’lantri: No a la briega de gladiaóris, no al esclavismu, igualdá de sexus, no al racismu, justicia social... abolición ‘el maltratu animal… y ya poníus, abolición de la guerra y defensa planetaria. Pol cima d’estéticas y “concepcionis artísticas”.

A sabel, toínus los seris vivus semus igualis, semus ijus de la Mairi Tierra... bóvidus y homo sapiens incluyíus… pol muchu que mus queramus miral el umbrigu.

Y, en efeutu es comprensibli qu’un indiu Yanomami o un Inuit caci… lu mesmu que jaḍi el león, el lobu u la lúndriga. Esu es supervivencia.

Algotru día, se puéi palral de las virtudis ‘el vegetarianismu.

*Internet photo

Pairi Sol...

Mar, Sol y Homo Sapiens

El sel humanu, asina toínu sel vivu d’esti praneta,
veleili… es Augua más Sol.
L’augua jaḍi,
el Sol nutri.

Amiga... t'alcuerdas?

T’alcuerdas amiga, de la juerza de los mis latíus en brincandu n’el pechu, en sublimis lubricanus de gaviotas libris… renti ti? T’alcuerdas ‘el roci de los mis bezus acogiendu las fragancias ‘el tu alientu? T’alcuerdas ‘el regilanti tactu ‘el mi pelleju en acariciandu el tu impetuosu cuerpu? T’alcuerdas ‘el mi jocicu múu y los mis oyíus eternamenti abiertus a los seductoris murmullus de la tu voci? T’alcuerdas de las mis mirás perdías ena inmensidá de los tus ojus… locamenti namoráu de ti?

T’alcuerdas, amiga mar? Amiga mar ausenti.

*Photo by Antòniu

Amiga mar (Praya de Baroña)

Alba, Alán, Arturo y Sergio

Gaviota navegandu n'el Oceanu Cielu

Lubricanus ena praya de Baroña

Alán, Alba y Carmela ena mar

(Esteiro)

El jombri y la Mar

Gaviota

Lubricanus ena Illa de Arousa

*Photo by Antòniu

Illa de Ons

bebiendu Universu

Tendíu sobri el praneta Tierra, po-la nochi, contemplu la inmensidá ‘el Universu ena cúpula celesti empreñá d’estrellas.
Una estrella fugaci, roza los bezus de los mis ojus… y me la bochincheu.
¿El mi deseu?... Velaquili, cumpríu.

Photo Internet

Photo Internet

Ñíu Universu

Volal comu gaviota libri
jacia el ñíu Universu,
rozandu conas alas
un eclipsi total de luna...

(Pa Red)

Photo Internet