lunes, 6 de diciembre de 2010
domingo, 5 de diciembre de 2010
Árbul seculal
Jaḍi unas semaninas, comu ca añu ena otoñá, jui con Alán y Alba renti un vieju amigu: el seculal castañu d'Aldianueva de la Vera.
Trátasi d’un ancianu ejempral que vivi ena sierra, en unus verdis pláus apedilláus Los Jorcajus… ondi pastan las vacas de Chilán.
Es entrevejiláu puel atribuyili una edá esauta peru en comparanza con algotrus castañus longevus, soi osáu de iḍil que sobripasa con crecis los cincu sigrus… ¿quiciás mileñu?
Es un ejempral empresionanti, tallúu, jorzúu, serenu y con un troncu de fabulosu perímetru (es prejisu el abrazu d’unas cuantas presonas p’abarcalu).
Llegamus, lu miramus con prazel, mus subimos enas sus potentis ramas pa sintilu prósimu, mus jiḍimus fotus con él…
Al dilmus, paecíamus agilal con ligereza, comu invadíus pol el miejón ‘el árbul.
miércoles, 1 de diciembre de 2010
lunes, 29 de noviembre de 2010
Sel árbul
A veḍis truecaríe el pelleju po-la corteza d’un árbul, el pechu pol el su troncu, la sangri po-la su sabia, el jocicu po-las sus arraiḑis… el miéu al pasu’l tiempu po-la su estática libertá.
A veḑis silenciaríe jasta las palabras… tan solu vel y oyel.
Julminal las espectativas, jundeal juera l’alma l’arrogancia esistencial.
Acaricial vientu con las mis ramas, bebel lluvia, respiral sol.
Legitimal los primerus botonis en primavera y ejal juéyigas de ojas ena otoñá.
Percebil el latíu de la Mairi Tierra en silenciu… sombreal sin asperal na.
A veḑis truecaríe la corteza pol pelleju.
miércoles, 17 de noviembre de 2010
Maestru árbul
Esistin jombris y mujeris consideráus “maestrus” u “maestras”, escapacis de transmitil namas con la su presencia, a sabel: sabencia, harmonía, lú, etc.
Suelin sel presonajis con una larga esistencia sobri el su lombu, portaóris d’un jondu mensaji y si cabi renovaol… y en ocasionis guías de multitudis.
Velaquili que tamién hai seris vivus nu humanus que d’anguna manera puéin sel consideráus auténticus maestrus. Maestrus múus, qu’igualmenti palran de trascendencia con la su sola presencia.
Refiérumi a los majestuosus árbulis longevus.
Son solemnis ejempraris centenarius, mesmamenti a veḍis mileñus, que pervivin jerri que jerri p’allá ondi germinorin en lejanus tiempus pasáus.
En el su mesmu miejón, constitúin una lición premanenti del sabel sel y estal.
Hei oyíu iḍil qu’hai un cedru enas montañas 'el Líbanu con 5.000 añus d’edá u lu qu’es lu mesmu: ¡Hubu nacencia enos emprencipius ‘ la civilización egipcia! En América, esistin secuoyas de 2.000 u 3.000 añus y cuasi 150 m. d’altitú (pol el troncu aburacáu d’anguna, agila una carretera). Hei ascucháu relatus de baobabs mileñus que son adoráus pa las Áfricas. D’igual móu, es venerá la Jiguera Mairi de la India, si cabi la más vieja ‘el planeta, escapá de cubril con la su copa a una tupa ‘ rebañus. Y el record en longevidá, paeci ostentalu un abetu de Noruega que escomencipió la su trocha vital en metá la Era Glacial, es iḍil, jaḍi 10.000 añus.
Ena Península Ibérica, habemus referencias d’un antigu castañu seculal en Las Alpujarras en cuyus aetrus moraba una familia de moriscus. En Asturies hai texus mileñus, en Girona una oliva de 2.500 añus y n’el norti d’Estremaúra castañus respajilonis con’el mileniu.
Presonalmenti, reconozu sintil un tiraeru total jacia estus maestrus. M’ atreveríe a jablal d’un ritu n’el mi alcuentru con ellus: arrejaḑelmi renti ellus cuasi reverencialmenti, esparigilmi con las sus dimensionis, intuyil la su hestoria, atesoral el su tactu, saboreal los sus frutus, percebil el su latíu n’el abrazu… y adeprendel de la su esestencia silenciosa.
Sí, son honorablis entidadis, tan dinas de sel almirás asina la grandi pirámidi de Keops u el Taj Mahal… tan egregius asina el mayol préncipi de préncipis… tan transcendentalis asina el mesmísimu Dalai Lama.
sábado, 30 de octubre de 2010
Dura Mairi Tierra
Me levantu a las 7 h. menus cuartu de la mañana.
Mediu adormiláu, me preparu un café con lechi y dúu entri ascuchal a Alan Stivell o vel la teli. Finalmenti, pol pura inercia, venci la caja tonta.
Entri suerbu y suerbu me jincu las noticias planetarias, que pa varial nu son na alentaóras.
Aparti ‘el monotema ‘ la “crisis” (frutu d’una macroeconomía despilfarraóra, agresiva e insolidaria) y el mesmu rollu patateru de siempris de los políticus de turnu, me sorprendin algotrus acontecimientus mundialis que s’escapan ‘el control del homo sapiens.
Entri mordiscá y mordiscá de tostá, desfilan anti los mis ojus desgarraóras imágenis venías d’Indonesia. Primeru jue la inesperá y desolaóra juerza salvaji ‘el tsunami: cientus de presonas arrancás ‘el su jergu pol gigantescas olas asesinas.
A continación, el estrumpiciu ‘el volcán Merapi. Ena pantalla, un ombri en motocicleta agila dificultosamenti pol un gruesu mantu de ceniza tósica… cuerpus asocarráus, casumbas arrasás y un paisaji pantasmal.
Es la cara bruta de la Mairi Tierra qu’arremeti violentamenti contra enocentis humanus sin previu avisu.
De siguíu llegan imágenis d’Haití, pol ciertu, el país más probi d’América: el cólera segandu vidas de nuevu (dañus colateralis al fin y al cabu de la furia de la corteza terrestri).
En un intri, m’aflora esi sentimientu de rabia y jasta ciertu puntu de nihilismu de l’adolescencia: “Si Dioh existi ¿Pol qué corciu, premiti toínu estu?”.
Aluegu arremetu contra la Tierra, comu iju que se revela: “¿Pol qué las tus guapuras y bondadis se tornan cruelis contra las tus criaturas predilectas?” (jaḍiéndusi inevitabli la enfluencia ‘el bagaji educacional antropocentrista recebíu) y nu puéu evital vela comu a un muchachinu malu qu’arrejaḍi un mecheru a la entrá d’un jolmigueru pa contemplal pol puru prazel comu s’arretuercin los desprotegíus bichinus entri la llama.
P’arrematal, me vienin recuerdus ‘el mi últimu viaji a la isla de Lanzaroti… de la belleza ‘el su paisaji volcánicu, consecuencia sin dúa anguna d’una violenta orogénesis. Recapacitu y piensu que quiciás na es de baldi… a pesal de todu.
D’anguna manera, cuandu Mairi Tierra manifiesta la su furia nu jaḍi distincionis, nu otorga privilegius al homínidu más evolucionáu… de na silvi la tecnología alcanzá ni los petrudolaris.
Percibu agora al Planeta comu un enti vivu que lati, que tieni juerza, que tamién s’espresa en ocasionis salvajimenti con efeutos secundarius indeseablis… y veu al sel humanu, chiqueninu, unu más, en igualdá de condicionis que cualisquiel sel vivu.
Y me s’antoja injustu y asurdu el “especismu” instauráu con prepotencia pol el Ombri (y la Mujel). Injustu, el arroganti y espiadáu aprovechamientu masivu de toa manifestación de vida animal y vegetal. Injustas las irreversiblis secuelas prevocás ena biodiversidá planetaria y el mesmu planeta, etc.
Sali el Sol enormimenti naranja entri la calma nébula, jaḍiendu sombras ena montaña. La su silueta me trai sosiegu.
Desenchufu con desairi la tonta caja, acabu el mi café y enantis de dilmi pa’l trebaju, pongu pol fin “Tir na Nog” d’Alan Stivell… el vieju son de la tierra de la eterna joventú.
martes, 12 de octubre de 2010
Liberté, egalité et fraternité...
Endi nuevinu, la numismática ha síu unu de los mis tiraérus favoritus.
Escomencipié a colecional monëas con apeninas sieti u ochu añus. Ena iscuela había un niñu cuyu pairi labutaba de conserji n’el Paraol de turismu (antigu castillu).
Aquel ḍagal, acuía a los recreus con una tupa ’ monëas estranjeras qu’el su pairi arrepañaba n’el “estanqui ‘ los deseus”.
P’Altoncis, yo estaba acostumbráu a la pesetina de rigol con águila emperial de banduju atiborráu de castillus, leonis, caënas, barras, incluyía apetecibli graná… ñugu sin güeyis peru con frechas… y entovía la omnipresenti y flotanti caëza reönda d’un tal Francisco Franco Bahamonde. En divisa “golosinil” (desculpas pol el palabru), vendríe a sel una borsa de pipas tamañu meyu, decena ‘ caramelinus, piruleta grandi u biscochu rellenu ‘ chocolati.
Reconozu, qu’estéticamenti a mí la “rubia” me molaba, pol aquellu de sel l’águila el mi animal preferíu -quiciás pol almiral el su vuelu- peru lu flipaba al dil descubriendu el nuevu y variáu abanicu pecuniariu ofrecíu pol el iju ‘el conserji ’ l castillu.
Fascináu, emprecipié a cambiali los mis cromus pol monëas.
Yo, fantaseaba con los llamativus diseñus acuñáus po-las diversas fábricas de monëa y timbri. ¡Esestían otrus idiomas!: “One dollar, one pound, um escudo d’ouro... Polska, Österreich, Republique Française… Liberté, Egalité et Fraternité…”
Pol ciertu lu de Republique Française (más tardi sabí que nu se prenunciaba francaise sinu fransese) y lu de Liberté, Egalité et Fraternité… me queaba prendiítu. Güenu, la verdá es que a mí la Francia ya me diba tirandu: el esotismu de las amigas francesas de las ijas d’emigrantis qu’acuían en veranu con los sus cabellus colol oru y precoci coqueteu prepotenti; el idioma francés eleganti y enigmáticu; la Torri Eiffel y el Arcu ‘el Triunfu, etc.
Sí, la monëa d’un francu con la emblemática fegura de la dama con gorru revolucionariu jundeandu simientis en un campu con sol punienti, me punía (numismáticamenti palrandu)… especialmenti el su lema.
En efeutu, aquellu de Libertá, Igualdá y Fraternidá, a pesal de las mis “limitás” entendeéras, me paecía grandiosu. Lu de sel libris, igualis y gelmanus, sonaba perfeutu.
Dispuesinu m’emprecipiorin a seucil las monëas antiguas y particularmenti las romanas. Esu d’apalpal con las mis manus un esidáu e ilegibli sesterciu (regateáu ena Praza de Cascorru) que sin dúa anguna hubu apalpáu un sel humanu jaḍía dos mil añus, me paecía mágicu.
Pasorin los añus.
N’el jondu creu sel el mesmu muchachinu que truecaba estampinas pol monëas peru con pelaúra d’adultu pol juera… y pol que nu iḍilu, con ciertu bagaji esistencial.
¿Al tentu ‘ la Francia?... por qué negalu, una mijirrinina defraudáu. Una mijirrinina defraudáu con la Francia y si soi sinceru, con’el mundu enteru (perdonái el masimalismu). Me refieru a esi mundu derrochaol, belicosu, insolidariu y escachinaol de la biodiversidá.
El ésodu po-la juerza, de ciudadanas y ciudadanus gitanus decretáu pol Sarkozi es la punta ‘el Iceberg d’un Ocidenti no tan libri, pocu igual y pocu fraternal.
Mus dirán qu’el lema agora es velaili: “Liberté, Egalité, Fraternité et Responsabilité”… peru toínu es mentira… una grandi mentira.
domingo, 3 de octubre de 2010
Lanzaroti
Jaḍi pocu hei díu de viaji a la isla de Lanzaroti con Alán y Alba. Sin dúa anguna, hei de reconocel qu’a la hora de descogel el sitiu de destinu jue determinanti la su atractiva oferta de “material pictóricu telúricu”.
Lanzaroti, es una gelmosísima isla volcánica a tupil de contrastis, ondi se puéi “mascal” planeta.
En esta ocasión prejerimus rejuyil las rutas turísticas de costumbri y perdelmus pol el territoriu.
Toínus los días jaḍíamus ascensionis a angunus de los numerosus y variáus conus volcánicus –angunas atrevías- ondi aparti de puel disfrutal de la su belleza, arrecogíamus muestras de lava solidificá de variás tonalidadis y testuras: el Volcán Tao, con’el su vientu y los sus campos de cultivus prateáus; el Volcán Corona, con la su intrépida subía y espectaculal crátil; la Montaña Colorá, con las sus perigrosas jiendas n’el caminu y finísima arena dorá… y algotrus, que musotrus bautizamus: el Volcán Oasis, con la gigantesca palmera y las jigueras asilvestrás de suculentus jigus, en los sus aentrus; el coloraínu Volcán Luna-Colorá con las sus estructuras circularis de decadentis cultivus, en lu jondu ‘el crátil; el eleganti y multicolol Volcán Montaña de Pieiras; los asombrosus Volcanis Lingua de Lava…
Pol otru láu, tamién juorin memorablis las horas pasás apaciblementi arrepañandu cristalinus d’olivinu erosionáus po-la mar n’el Golfo o ena cala de la Montaña Bermeja... cálida arena negra renti Los Jerviérus… arena d’oru n’El papagayu y Puertu ‘el Carmin… tierra calicia en los acantiláus de las cuevas de los guanchis, etc.
Al dilmus de la isla, jui envadíu pol ciertu sentimientu de… ¿tiraeru?... pol to lu vivíu.
Agora, de nuevu ena península, n’el mi tallel de pintura, acariciu los cristalinus de variáus tonus verdosus y acarameláus, las diversas arenas con los sus suculentus tactus, las pieirinas volcánicas lu mesmu qu’asteroidis en chiqueninu… y arrecuerdu los momentus, lu percebíu y sintíu, la insuperabli compaña… y nuevamenti sientu el latíu de la isla con los vestigius de la su abrupta orogénesis, el latíu de la Mairi Tierra… el mi latíu.
La creatividá está velaquila sirvía en bandeja.
Agraecíu, Lanzaroti.
miércoles, 22 de septiembre de 2010
miércoles, 11 de agosto de 2010
Adictu a TV Natural
Saboreu las delicias de la Mairi Tierra mentris me jincu n’el almuerzu un pratu de prísigus frescus con bananas y contemplu la “TV natural” endi la mi ventana… sintiéndumi sin dúa privilegiáu.
Namas puéu sintonizal en esti receptol un únicu canal peru esu sí, en vivu y direutu: Canal Montaña.
Reconozu qu’es lu mesmu de continu: el bosqui de robris y castañus cuasis metiéndusi po-la pantalla ‘el televisol (la ventana), las praéras a lu largu, el caminu y en lu altu, las cumbris -a veḍis picúas- a las cualas musotrus las habemus poníu nombris pola curiosidá de las sus formas y peculiaridadis (picu Rinoceronti sin cuernu, picu Mamut, montaña de Cuarzu, etc.). Peru a iḍil verdá nu siempri es lu mesmu, ca momentu es distintu, pus hai vida: un pajarinu jaḍiendu el su ñíu, vacas trasumantis que subin pa la sierra, una maná de cabras montesas qu’ajuyin de los rigoris ‘el hivielnu y abajan, luḍi un sol espléndidu, una espectaculal tormenta eja el ecu de los sus troníus po-los vallis, la otoñá da pincelás multicoloris, nieva con juerza, la nébula debuja fiordus… y los mil ruíus… u el silenciu.
Nu hai espacius publicitarius ni programas “nu aptus”… y en efeutu, siempri de baldi.
Anochi, me s’ocurrió punel un ratinu la TV artificial (caja tonta) mentris cenaba y…
las imágenes que púi dinguelal en apeninas unus minutus juerun desolaóras:
Genti en Moscú, con mascarinas n’el jocicu ajuyendu de la densa bruma ‘el jumu los incendius qu’arrasan Rusia con la seca, decenas de muertus en los mesmus; milentas presonas ajogás y millonis sin jogal enas lluvias torrencialis de Paquistán e India, Madame Obama y toa la parafernalia ‘el su sèquitu, vesitandu la praza ‘ torus de Ronda con gastus millonarius en seguridá; mujeris en Irán, sistematicamenti jumillás… Uf!
Ejáimi enchufalmi a la teli natural!... Nu emporta ondi, nu emporta cuandu.
Agraecíu.
lunes, 9 de agosto de 2010
Torus?... No, agraecíu.
Una veci, jaḍi añus abondu, púi dinguelal endi cerquina los ojus d’un toru agonizanti en una praza d’un pueblu… con el escandalosu charcu de sangri de costumbri, arreol. La mirá ‘el animal nu mentía: ¡Espresaba una tristura esgarraóra! (los torus sientin mesmamenti). Endi altoncis lu vidi craru:
Sí, me merecin respetu aquellas presonas que pol mé la tradición, la cultura, etc. aman la tauromaquia peru muchu más respetu y consideración me mereci el toru qu’ al fin y al cabu es criáu pa finalmenti sel torturáu cruelmenti y asesináu... pa esparigilsi el presonal. Velailu.
Se puéi doral la píldora de continu jerri que jerri con alusionis y metáforas que puéin dil endi el minotauru de Creta jasta Picasso, pasandu pol razonis históricas, económicas u d’identidá peru se miri comu se miri cualisquiel “festeju” taurinu (cualisquiá, sin esclusiónis), es una salvajá injustificabli e injusta.
¿Libertá pa los que desean corrías de torus? Si juesi con feguras de cartón… ¡pol supuestu! ¿Qu’hai de la libertá y la dinidá de los astáus?
¿Sensiblería?... Metánsi n’el su pelleju.
¿Que l’adrenalina de la “lidia” lus rejuyi el dolol?... improbabli. En to casu… ¿justifical d’igual móu la padecencia minguá po-la hipersecreción adrenalínica frutu ‘el miéu a la briega, d’un dagal (recrutáu si cabi po-la juerza) con metralla n’el pechu? ¿justifical de pasu el ejerciciu sin sintíu, legalmenti institucionalizáu, de los conflictus bélicus?... Las comparanzas nu siempri son odiosas.
Es prejisu dil p’lantri: No a la briega de gladiaoris, no al escravismu, igualdá de sexu, no al racismu, justicia social... abolición ‘el maltratu animal… y ya poníus, abolición de la guerra y defensa planetaria. Pol cima d’estéticas y “concepcionis artísticas”.
A sabel, toínus los seris vivus semus igualis, semus ijus de la Mairi Tierra... bóvidus y homo sapiens incluyíus… pol muchu que mus queramus miral el umbrigu.
Y, en efeutu es comprensibli qu’un indiu Yanomami o un Inuit caci… lu mesmu que jaḍi el león, el lobu u la lúndriga. Esu es supervivencia.
Algotru día, se puéi palral de las virtudis ‘el vegetarianismu.
sábado, 10 de julio de 2010
Amón-Ra
Son cuasi las tres (pm), salu ‘el trebaju con cierta cansera... Recibu el guantaḍu de la flama de la meyudía. ¿Hadrá 40º C?, iḑin que vienin airis ‘el Sájara.
Introduzu la mi manu enas faldriqueras y sacu las llavis de la mi máquina de consumil combustibli fósil. Reconozu el familial tintineu n’el roci entri ellas al abril la puerta. ¡El cochi paeci una sauna a másima potencia, el día de más calol ‘el sigru, en Atacama!... Sin embargu, m’ acuerdu d’ eneru, puniendu con deus dolorosamenti gélidus las caenas enas rueas en metá una nevá desagerá. Es güenu sintil el pasu las estacionis, es güenu sintil.
El rugíu ‘el motol deseguía me pon en ruta.
Conduzu aspacinu disfrutandu de la belleḍa ‘el paisaji. En efeutu, el estíu va dandu pincelás verdi amarillosu peru enos picus más altus de la montaña entovía percebu angún neveru que s’arresisti a rejuyil al hivielnu.
De repenti agazapu una curva cerrá abondu y al salil d’ ella, la fegura deslumbranti d’ un sol abrasaol de quiciás 40ºC m’ enciega completamenti. Pol momentus me sientu molestu y jasta m’entran ganas de despotrical contra el astru rei.
Pol fin pillu una larga recta. Llevu las ventaninas completamenti abiertas y una impetuosa corrienti d’airi calienti m’ invadi.
En un intri concretu, tou paeci perfeutu: el vientu sajarianu lambiendu la mi faci, “No, woman, no cry” de Bob Marley ena radio… y en frenti, de continu la reondé luminosa de la nuestra estrella.
Influenciáu quiciás po-l’alta temperatura y el relax de la condución, entru en un curiosu estáu de "concencia". Me sientu estrañu y sientu toínu agradablimenti estrañu.
Escomienzu a dinguelal el mi arreol d’ una manera especial… si cabi con l’asepsia ‘el oservaol endi juera u el que lu jaḍi pol primel veci. Llegu a maginalrmi com’ un estraterrestri trayíu d’ un áridu asteroidi pa sel jincáu en un veículu evolucionáu( la mi máquina de consumil combustibli fósil) que recorri un paradisíacu planeta llamáu Tierra.
Aguzandu posiblimenti la sensibilidá, apreciu tou con una sutileḍa indescriptibli. Descubru desbordanti juerza esistencial en cuantu m’ arrodea… y el sol ya es Sol… el mu helénico dioh Helios, el supremu Amon-Ra egipciu, el to poerosu Inti incaicu.
En Flashback retrocedu unus añinus atrás: l’amanecía n’el templu de Karnak enas riveras ‘el ríu Nilu, la ígnea silueta ‘el discu solal completamenti naranja iluminandu las mis juéyigas ena avenía de las esfingis
Namas me s’ocurri susurral algu agora:
¡Agraecíu Pairi Sol!
miércoles, 7 de julio de 2010
Cúpula celesti
Ya vienin siendu más de las 24 horas.
Alán y Alba duermin. Salu de la mi enrramá pa sintil una mijirrinina la nochi. Istintivamenti agilu renti el canchu de miral pa las estrellas y me tumbu un ratinu en metá d’el. Montañas a los cuatru puntus cardinalis que jaḍin d’almuá y la cúpula celesti preñá de galasias, pol sábana.
Pol momentus, percebu a esti improvisáu jergu, comu una continación más del úteru de la Tierra… y me veu a mí mesmu com’ un ḍagalinu, chiquerreninu, polcima ‘ la reondé ‘el planeta… microscópicamenti giganti.
En un intri, escomienzu a ascuchal el latíu de Gaia con juerza:
PUM- Pum, PUM- Pum, PUM-pum
Mas dómi de cuenta de qu' el pulsu provieni verdaeramenti ‘el mi pechu y… me riyu. U, acasu… ¿es el ecu ‘el su corazón n’el mi cuerpu?
Permanezu en silenciu pol drentru. Una levi mareína cálienti de veranu acaricia la mi cara, susurrando en los oyíus cancionis de grillus y de corrientís d’augua endi largu.
De golpi, el atronaol rugíu de los motoris d’un avión que navega parpagueanti pol to’l cielu, me sabi a homo sapiens y cuasi me jaḍi ajuyil del paradisu… peru una estrella fugaci… y dispuésinu otra, enmuécin los mis pensamientus elantri la inmensidá ‘el Universu.
…Y me veu a mí mesmu gigantescamenti microscópicu.
jueves, 1 de julio de 2010
Pintura telúrica
Denominu asina a la mi pintura pol estal quiciás relacioná abondu con los elementus de la Mairi Tierra, veleí en jorma y fondu.
Recopilu y recopilan pa mí, en lugaris especialis: tierras, arenas, pigmentus naturalis etc… de diversus coloris, testuras, mesmamenti aromas.
Ca cuadru porta la impronta de distintus territorius (incluyíus espacius emblemáticus), de distintus grupus humanus,... amás la energía propia ‘el planeta.
En ocasionis, jincu detallis chiqueninus de materia orgánica perdurabli, ésidus, mica, cuarzu cristalizáu, gemas, cristalinus volcánicus erosionáus po-la mar etc.
Suelu labutal sobri tábula fina. A veḍis arrejundin viejas tábulas de casas efarrungás, cachinus de maëra de barcu pulíus po-la mar etc.
Puéi idilsi que d’anguna manera empreu el “puntillismu”, el depósitu minuciosu y lentu de materia sobri el soporti. Nu hai grandis pincelás comu en acuarela u óliu.
Ajuyu de la “simplúra” de lu entrevejiláu, me seduci lu “entrevejiláu” de lu simpli. Me sientu, en grandi medía, arrempujáu po-las manifestacionis artísticas más primitivas… tamién nel usu de los elementus: arti rupestri, pueblus prerromanus, Egiptu, África Negra, Aborigin, pueblus precolombinus, románicu. Lu arcaicu, lu étnicu, lu mágicu, mundus legendarius u perdíus, seris fantásticus… Sin olvial lu cotidianu.
Esisti un ritual al jaḍel la obra: apalpal la tierra, sintila, golela, recordal, manipulala con sumu respetu. Es prejisu juegal con las tierras, con las cantidadis d’augua, con la temperatura de secáu, con las mesclas etc. pa consiguil efeutus deseáus: jiendas, cráteris, volúmenis, testuras, brillus, tonalidadis. Es obrigáu ejal reposal los elementus creáus, en fasis, y esprimental visualmenti el efeutu causáu pa dil acontinandu dispuesinu...
Na es de Baldi.
Po otru láu, consideru las propiedadis e influencias de los elementus qu’arrepañu a la hora d’aplicalus comu material pictóricu. Del mesmu móu, nu me son endiferentis ciertus conceitus de la cromoterapia.
Tamién esisti, quiciás, un valol mágicu más allá de lu meramenti perceptibli… acasu emulandu lu chamánicu y arquetípicu de la pintura parietal prehistórica.
Hai algu más que cuadru, va alma. ,
En las escenas precuro aportal un mensaji subliminal d’ harmonía.
Y polvus mágicus d’intuición y amor creativu…
*Painting by Antòniu
"humanus y sol"
Hoi
Hoi eh el primel y últimu día enantih d’a mañana. Prioritariu en un jaci grandi d’ocasionih prioritariah de sel sintíah… prioritariamenti …
A mañana, nu esihti. Navegamuh enel hoi.
Agilamuh, jereéruh de luh antiguuh primatih, con finu pelleju y caëza evolucioná. Portamuh un corazón que lati máh allá lu predehtináu po-la nuehtra información genética y lu socialmenti correutu… puh habemuh miejón propiu, alma.
A mañana, nu esihti. Navegamuh enel hoi.
Agilamuh, jereéruh de luh antiguuh primatih, con finu pelleju y caëza evolucioná. Portamuh un corazón que lati máh allá lu predehtináu po-la nuehtra información genética y lu socialmenti correutu… puh habemuh miejón propiu, alma.
Suscribirse a:
Entradas (Atom)